Bordele, Frantzia. Otsailaren 22tik martxoaren 25era egongo da ikusgai Bordaleko Euskal Etxean Maiana Agorrodyren margolan erakusketa. Lanok ParOdisiak izeneko bildumako parte dira eta artistaren gainerako lanek bezala ixtorio luze bat kontatzen dute. Maiana beraren hitzetan, “Ixtorioa No Future seriearekin hasi zen. Serie horrek errebelde tropa bat erakusten zuen, gure planetatik ihes egiten ari zena, mekanika akastun batzuen barnean”.
Segitzen du Maianak: “Bidaia luze eta arriskutsu baten ondotik, lurralde berri, eder eta basa batera lurreratu ziren, dena (berr)eraikitzekoa zuten; hori izan zen bigarren seriea, DystrOpik izenekoa". "ParOdisiak bilduma berri honetan, berriz, gizaki hauengana hurbiltzen gara. Azken hauek, aske, maskarak erantzi eta beren aurpegiak erakusten dituzte. Elkarrekin, gure munduak finkatutako baloreak eta normak galdezkatzen dituen gizarte inklusibo eta libre bat sortzea proposatzen dute”, azaltzen du Baionan jaiotako artistak.
ParOdisiak
Erakusketak hamabost bat lan erakutsiko ditu, gehienak 70x100cm neurrikoak, eta egurrezko potreta triptiko bat ere bai. “Hau izango da nire lehen erakusketa euskal etxe batean; izan ere gehienetan kultur zentroetan erakusten dut nire lana, Miarritzeko Atabal erakusketa gelan erakutsi nuen 2023an eta joan den uda Hendaiako Mendi Zolan gelan, adibidez. Xiberotar sustraiak ditut eta egun Larresoron bizi naiz, baina Arte Ederrak Bordelen ikasi nituen eta pozten naiz harat itzultzea margolan bilduma hau erakusteko”, diosku.
Inaugurazioaren egunean Maiana bera egongo da aretoan eta bere lana aurkezteaz gain afitxak, tixertak eta bustinezko pertsonaia batzuk ere ekainiko ditu salgai. Hitzordua otsailaren 22an, arratsaldeko 6:30etan, Bordaleko Euskal Etxean.
Maiana Agorrody sarretan,
- Instagram: maianaagorrody
- Facebook, Maiana Agorrody
Lagun bati bidali
Komentarioa gehitu
