euskalkultura.eus

Madril, Espainia. Madrilgo Euskal Etxeak aditzera eman du aurtengo Euskal Jaien egitaraua. Aurreko edizioetan El Retiro parkean ospatzen zuten festa hau, baina aurten, nagusiki arrazoi ekonomikoak direla eta, elkartearen egoitza izango da ekitaldien gunea. Horrela, elkarteak egoitzaren kokaleku bikaina eta instalazioak ezagutzera emateko parada baliatuko du eta, bide batez, urtean zehar bertan ekimenetara biltzen diren bazkideei merezitako omenaldia eskainiko die. 

Elkarteak jakinarazi duenez, hau da behin-behineko egitaraua:

• Astelehena 7, 20:00tan, Pello Aramburu saloian, «Un león en El Foro» saria emango dio Peña Athletic-ek Julian Lopez aktoreari (Muchachada Nui).
  
• Astelehenean bertan, 20:30tan, Jardueren Eguna: Euskaltegia, Peña Athletic eta Orfeoia izango dira protagonista. Bertaratzen direnentzako askaria prestatu du euskal etxeko eraikinean dagoen Sagardi jatetxeak.
• Asteartea 8, 20:00tan, Pello Aramburu saloian, "Jai ta Lan" ikuskizuna, Londresko euskal talde baten eskutik. Irudiak eta musika zuzenean.
• Asteazkena 9, 20:15tan, Jardueren bigarren Eguna: protagonista izango dira Futbol taldea, Mendi elkartea eta Dantza taldea. Oraingoan ere, Sagardik prestatuko du askaria.
  
• Osteguna 10, 20:00tan, Pello Aramburu saloian, mahaingurua: "Vascos en Madrid". Karmele Aranburu, moderatzaile.
• Ostirala 11, 20:00tan, San Inazio elizan, Orfeoiaren eta Dantza taldearen emanaldia. Ekitaldi honetan omenaldia egingo zaio iaz, urriaren 12an hil zen Pablo Beltran de Heredia bazkideari.
  

Bestalde, astean zehar erakusketa aretoan elkarteko bazkideen margolanak izango dira ikusgai.