euskalkultura.eus

Macachin, Argentina. Oso lanpetuta ibili dira Macachingo euskaldunak azken bolada honetan eta batez ere euskal etxeko gazteak. Izan ere dantzariak berak izan dira 'Eskolen Arteko Olinpiadak' delako txapelketaren antolatzaile nagusiak. Ekitaldia joan den irailaren 12an hasi zen eta ekintza guztiak Euzko Alkartasuna hotelean egin ziren.

Macachingo hiru eskoletako ikasleek hartu zuten parte euskal etxearen proposamenean eta aukera handia izan zuten euren iaiotasuna kirol ezberdinetan erakusteko, tartean, boleibol, saskibaloi, pilota paleta, padle, futbol-tenis eta mahai-tenisean eta, euskal ekintzen artean, mus (ikasleen guraso edo aiton-amonei begira) eta sokatiran.

[Boleibola izan da praktikatu den kiroletako bat (argazkia EE)]

“Ekitaldiaren helburua ikasleek ondo pasatzea eta kirola bultzatzea izan da. Bide batez, geure erakundea ere elkargunea izan daitekeela azpimarratu nahi izan dugu”, azaldu dio euskal etxeko kide den Marigen Mujicak EuskalKultura.com-i. “Hau izan da Eskolen Arteko Olinpiaden lehenengo edizioa, baina gazteen alaitasuna eta engaiamendua ikusita, ziur gaude ez dela azkena izango”, adierazi du Mujicak.

Jaialdiarekin bukatu eta udaberriari ongi etorria emateko erromeria ospatu zen itxura berria duen Euzko Alkartasunaren egoitzan (gogora dezagun Macachingo euskaldunak zaharberritzen ari direla hotela eta España kalean dagoen horman Euskal Herriko zazpi lurraldeen armarriak eta baita Macachingo eta Gure Ametza taldearena ere margotu ziren).

[Aste osoan zehar herriko gazteak euskal etxean bildu ziren (argazkia EE)]

“Erromerian lehiaketen sariak banatu ditugu. Esku-dirua izan da sari nagusia gazteek kurtso amaierako bidaia prestatzen ari baitira eta behar baitute. Primeran pasatu dugu festan, giro bikaina gailendu zen ordu txikiak arte. Goizeko 4:30etan itxi ditugu hoteleko ateak”, esan du euskal etxeko kideak. Bistan da Macachingo euskaldunak martxan daudela berriro eta, dudarik gabe, hau bezalako ekintzak etorkizun oparo baten seinale dira.