Lyongo Cervantes Institutuak Gabriel Aresti izena jarri dio bere liburutegiari eta poetaren lanen fondoa sortu du

Amelia, Gabriel Arestiren alarguna, eta poetaren alaba Lyonen izan ziren joan den ostegunean 'Gabriel Aresti' izenarekin bataiatu duten Cervantes Institutuko liburutegiaren inaugurazio ekitaldian. Henrike Knörr euskaltzainak eta Jon Kortazar, Euskal Herriko Unibertsitateko Literatura katedradunak euskal kultura eta Arestiren lanaren inguruko mintzaldiak eman zituzten. Lyongo Cervantes Institutuak poeta bilbotarraren lanen fondo berezia sortu du eta antologia bat argitaratu, euskaraz, frantesez eta gaztelaniaz.

Lyongo Cervantes Institutuak 'Gabriel Arestiri eta harek idazteko erabiltzen zuen hizkuntzari' omenaldia egin nahi izan dio bere izena emanez erakunde horren bertako liburutegiari, Institutuko zuzendari Domingo García Cañedok BasqueHeritage.com-i azaldu dioenez. Aresti (Bilbo 1933-1975) izen handia da euskal literatura garaikidean, euskal poesia eraberritu baitzuen, 'errealismo sozialaren norabidean sartuz', inaugurazio ekitaldian parte hartu zuen Kortazarren azpimarratu legez. Lyongo Cervantes Institutuak poeta bilbotarraren lanen fondo berezia sortu du, euskal erakundeek emandako dohaintza eta Institutuak berak egindako erosketen bidez osatua.

'Liburuki zahar eta argitalpen berezien liburudendatan poetaren lanen ale ugari aurkitu ditugu, batzuk Arestik berak sinatuak', azaldu du García Cañedok. 'Horietariko batzuk zinez bereziak dira, Henrike Knörrek egunotan aitortu digunez. Adibidez, badugu Baionan argitaratu eta Arestik sinaturiko antologia bat, Pariseko liburudenda batean aurkitu genuena'. Institutuak Arestiren antologia bat ere argitaratu du, hiru hizkuntzatan (euskara, frantsesa eta gaztelaniz), Jon Kortazarren hitzaurre batekin. Bilboko udaletxearen laguntza izan du argitalpen honek. [Ezkerreko irudian euskal ordezkaritza Arestiren alargun eta alabarekin, Lyongo Cervantes Institutuko zuzendaria eta ontsul espainiarra (argazkia CervantesLyon)]

Liburutegiaren inaugurazioak Lyonera ekarri ditu joan den ostegunean Arestiren alarguna eta alaba. Bertan izan ziren baita ere Henrike Knörr eta Jose Luis Lizundia euskaltzainak eta Jon Kortazar katedraduna. Ekitaldiak Lyongo agintarien eta Lyon eta Borgoñako Unibertsitateko ordezkarien parte hartzea izan zuen. 70 bat lagun bildu ziren ekitaldira eta ondoren egin ziren hitzaldietara. Henrike Knörrek 'Vasconiatik ibilaldi bat' proposatu zuen, euskal kulturak emandako lanen bitartez, eta Jon Kortazar Arestiren lanaren inguruan aritu zen. [Eskuineko irudian Cervanteseko zuzendaria mintzaldia aurkezten, alboan Arestiren alarguna, Jon Kortazar eta Henrike Knörr (argazkia CervantesLyon)]

Lotura interesgarriak

Lyongo Cervantes Institutua, Frantzian
http://lyon.cervantes.es

Gabriel Arestiren bibliografia eta loturak
Literaturaren Zubitegian

Gabriel Arestiri buruzko informazio gehiago
Wikipedian

'Gabriel Arestiren Etxea' poesi jardunaldiak, Ean (Bizkaian)
EuskalKultura.com-en argitaratura 2006ko uztailaren 22an

euskalkultura.eus

Albisteak

Lyongo Cervantes Institutuak Gabriel Aresti izena jarri dio bere liburutegiari eta poetaren lanen fondoa sortu du

Irakurrienak

Azken komentarioak