Londres, Ingalaterra. Talde eibartarra azaroaren 1ean iritsiko da Londresera, The Fiddler's Elbow aretoan jotzeko. “Zatoz gurekin euskal rockaren Halloween-eko gau tematiko zirraragarri batez gozatzera” dio Londreseko Euskal Etxeak luzatu duen gonbiteak. Eta ‘Sorginen gaua’ girotzeko, abenduan plazaratuko duten disko berriko abesti batzuk aurreratuko dizkiete zale londrestarrei, taldearen klasikoak ere jotzearekin batera, jakina.
1999an Eibarren (Gipuzkoan) sortua, zazpi lan diskografiko ditu kalean Kokeinek, kide dituela Iker Saenz Zaitegi (gitarra), Zaloa Urain (ahotsa), Ruben Txitxes (gitarra), Jatsu Argarate (baxua), eta Haritz Lete (bateria eta ahotsa). Euskal geografiako herri ugaritan jotzeaz gain, Sua, Mice, Zea Mays... bezalako artistekin konpartitu izan ditu agertokiak. 2024 honetan, eta hiriburu britainiarreko Euskal Etxeak gonbidaturik, amaiera berezia emango diote 'Atomika Tour' birari, Camden auzo mitikoan. Sarrerak hemen eros daitezke.
Kokein taldea Instagramen, kokeinrock
Web orri ofiziala, https://kokein.com/
Urte amaiera
London Basque Society - Euskal Etxeak aurreratu nahi izan du baita ere 2024ko Urte Amaierako Festaren antolaketa ongi doala. Abendu hasieran egingo dute, aurten abenduaren 7an, ohiko biltoki duten Goodinge Community Centre-n. Eta ohi bezala, Olentzerorekin batera, eta Urte Amaiera ez ezik Euskararen Eguna ere ospatuko dute bertako bazkide eta lagunek, norbanako eta familia eta haurrek. Parte hartzeko asmoa baduzu, egin mesedez lehenbailehen zeure erreserba, hemen.
Lagun bati bidali
Komentarioa gehitu
