euskalkultura.eus

Izan ere, bilera batean izan ziren Argentinako Kongresu Nazionalean, Ganberako Giza Eskubideen Batzordeko titularra den Remo Carlottorekin. Bilera horretan Diputatuen Ganbera argentinarrak Francoren garaiko sarraskien kontrako aldarrikapena eta kereilariei emandako babesa ezagutarazi zizkien euskal hautetsiei. Honekin lotuta eta Argentinan gertatutako bertako krimenei dagokienez, egia, justizia eta ordainaren alde egiten ari den lana hobeto ezagutzeko, Adolfo Perez Esquivel Nobel saridun eta Maiatzeko Plazako Ama eta Amonekin ere bildu ziren euskal mandatariak. Bisitaren programa barruan, Buenos Airesko Oroimenerako eta Giza Eskubideen Sustatze eta Defentsarako Espazioan (ESMA-ohian) errezibitu zituzten parlamentariak. Egitarauarekin bukatzeko, hiriburuko Laurak Bat bisitatu zuten.

Mahai-ingurua: frankismoaren biktimak eta gaurko egoera

Aurrekoarekin lotuta, joan den abenduaren 5ean kereilaren egoeraren berri emateko mahai-inguru bat burutu zen hiriburuko Laurak Bat Euskal Etxean. Beste bilkura honetako partaide izan ziren Iñaki Anitua (moderatzaile); kereilaren abokatu eta Gizakiaren Eskubideen elkarteko kide Hector Trajtemberg; kereilaren talde juridikoaren abokatu Ana Mesutti; Espainiako Kongresuan Amaiur talde politikoaren ordezkari den Sabino Cuadra diputatu nafarra; eta ‘Martxoaren 3ko biktimak' elkarteko Andoni Txasko Diaz, guztiak kereilariak; eta Josu Ibargutxi Frankismoaren krimenen kontrako Kereila Argentinarreko Euskal Plataformaren bultzatzailea.

[Buenos Aireseko Laurak Bat-en egindako mahai-inguruaren irudia]

Gogora dezagun, Buernos Airesko Laurak Bat Euskal Etxeak Servini de Cubria epaileak irekitako 4591/10 zenbakiko kereilaren aldeko agiria sinatu zuela 2012an.