euskalkultura.eus

Donostia-San Sebastian. Aberri Eguna berez Bazko Igandean ospatzen bada ere (aurten martxoaren 31n), Diasporan hainbat euskal etxek aste batzuk atzeratzea erabaki ohi dute, ahalik eta bazkide gehien bildu ahal izateko. Egunotan horietako batzuen berri ari gara jasotzen oraindik, hala nola, Las Vegaseko Lagun Onak euskal etxe estatubatuarrak egin zuen Aberri Eguneko piknikaren albistea. 

Elkarte honetako bazkideak iragan apirilaren 14ean bildu ziren, Red Rock Canyon Parke Nazionalean egin zen bazkarian. Giro aparta izan zen jaian, eta Amaya Beristain bazkideak eguneko argazki batzuk partekatu ditu gurekin.

[Javier Yarza eta Jesus Goicoechea, Las Vegaseko Lagun Onak elkartearen Aberri Egunaz gozatzen (argazkia LasVegasEE)]

Marta Gonzalez gogoan El Salvadorren

El Salvadorretik ere heldu zaigu berririk; izan ere, Ertamerikako herrialde honetako euskaldun talde batek apirilaren 14ean ekitaldi berezi bat egin zuen Aberri Eguna ospatzeko. Nejapa herrian izan zen, eta bertara 40 bat euskaldun eta El Salvadorreko hainbat talderen ordezkaritzak (Frente Farabundo Martí para la Liberación Nacional taldea, esaterako) bildu ziren.

Ekitaldiak Marta Gonzalez euskal internazionalista izan zuen gogoan; halatan, bere senitartekoek eta lagunen berari buruzko eskutitzak irakurri zituzten. Marta Gonzalez (1980-1992) El Salvadorreko gudan hil zen.

Aurreko asteburuan, eta El Salvadorreko hiriburuan, bertako euskal etxeko kideak Aberri Eguneko elkarretaratze eta bazkari baten inguruan bildu ziren, kasu honetan bazkideen artean sukalde kontuetan trebeak diren zenbaiten abilezien emaitzak dastatzea deialdiko zati inportantea izanik.

Euskal Erria, Aberri Eguna eta urtemuga