euskalkultura.eus

Laprida, Argentina. Laprida, Tres Arroyos, Cnel. Pringles, Cnel. Dorrego eta Rio Colorado dira aste honetan Elvira Kortajarena egiten ari den biraren helmugak. Barrualdeko euskal etxeen egoera eta errealitatea ezagutzeko xedea duten bidaia hauetan Argentinako gizatalde euskaldunarekin harremanetan jartzeko aukera du Lakuako gobernuaren ordezkariak. Eta hala izan da Laprida herrian.

Abuztuaren 15ean, arratsaldeko 4etan heldu zen Kortajarena Lagunen Etxea-ra eta bertatik hiriko leku garrantzitsuenak ikustera gonbidatu zuten euskal etxeko kideek. Herriko kostaldea, kanposantua, Los Robles Gizataldeen Plaza eta Salamone-ren lanak bisitatu ondoren alkate Alfredo Ficher eta Viviana Lopez kultur zuzendariarekin bildu zen Gobernuaren ordezkaria. Bileran, ekonomia eta turismoari buruz hitz egin zuten Euskadi eta Lapridako agintariek eta gero opariak eman zizkioten elkarri.

Euskal etxera itzuli ostean, Kortajarena erakundeko kideekin elkartu zen gai instituzionalez mintzatzeko. Azpibatzordeetako arduradunek arlo bakoitzean garatzen ari diren proiektuak aurkeztu zizkioten ordezkariari: gazteen taldearen izenean, Lisandro Corriente; liburutegiaren izenean, Maria Ester Arrondo; sukaldaritzan, Alba Galetti; musean, Edgardo Larraza; pilotan, Eduardo Martin; dantzan, Martin Adrian; kultur arloan, Alicia Mendioroz eta Arturo Campion Ikasgunearen izenean, Cesar Arrondo irakaslea.

[Elvira  Kortajarenak eta Tomas Fernandez de Barrenak lore sorta utzi zuten euskal haritzaren oinarrian]

Iluntzeko 7etan, prentsaurrekoa eskaini zien Eusko Jaurlaritzaren ordezkariak Laprida bertako hedabideei eta 7:30etan Euskadiri buruzko hitzaldi bat eman zuen bildutako publikoarentzat. Mintzaldia bukatuta, herriko Kultur zuzendari Viviana Lopez-ek Kortajarena 'Hiritar Txit Argi' izendatzen zuen dekretua irakurri zuen.

[Maria Ester Arrondo, Elsa Eyherabide, Susana Igartua, Lorena Zabala, Elvira  Kortajarena eta Martin Adrian]

Ekintzekin bukatzeko, eta afaldu aurretik, Elvira Kortajarenak eta Tomas Fernandez de Barrena euskal etxeko lehendakari ordeak lore sorta utzi zuten Gernikako kimuaren oinarrian.