euskalkultura.eus

La Plata, Argentina. Hamabost urtetik gora darama La Platako Euzko Etxeak bere ekimenen berri Hargatik aldizkariaren bidez ematen, paperean zein interneten. Berripapera etxeko Euskara Taldeak egiten du eta nabaria da ezaugarri hau euskal hizkuntzak buletinean duen leku duinagatik; izan ere, artikulu gehienak euskaraz zein gazteleraz datoz, Diasporan eta Euskal Herrian ere maizegi berez sortzen ez den jarrera konprometitu baten emaitza.

Elkarteko kide eta EuskalKultura.com-eko lagun eta irakurle dugun Stella Maris Iturbidek azaltzen digunez, aldizkaria gehienbat euskal etxeko Euskara Taldeak egiten du, baina beti ere, bazkide, lagun eta zuzendaritza batzordeko kolaborazioak ere tarteko. "Batzuetan,  baliteke kolaboratzaile pare batek artikuluren bat Euskal Herritik bidaltzea, hizkuntza bietan edo euskaraz bakarrik. Azken kasu honetan, gaztelaniara ere ekartzen dugu; beste batzuetan, ikasleek edota irakasleek idazlanak eta materiala prestatzen digute eta argitaratzen dugu", dio. 

Aldizkaria La Platako Euzko Etxearen webgunean --www.centrovasco.com-- irakur daiteke, Euskara atalaren baitan. Stella Maris-ek azpimarratzen du gustura hartuko lituzketeela kolaborazioak, eta inork euskal gaiei buruzko artikulurik argitara eman nahi izanez gero, eurekin harremanetan jartzea besterik ez duela, emaila honako helbidera bidaliz: euskarataldea@yahoo.com.ar.

-Hargatik aldizkariaren 88. alea PDF formatoan jaisteko, jo hona.