euskalkultura.eus

La Plata, Argentina. 2008ko Argentinako Euskal Asteak azken 48 ordu bizi-biziak izan ditu, herenegun eta atzo egin ziren ekitaldiekin. Argentinako euskaldunek pozez ospatu dute egunotan urtean zehar eginiko lanaren plazaratzea, dantza, kontzertu eta beste hamaika ekitaldiekin. Asteburua lanean hasi zuten baina, goizeko lehen orduetan hainbat bilera izan baitziren eguneko egitarauan: FEVAren bilkura eta Argentinako Euskal Etxeetako Liburutegien X. Bilera. Txikiek, aldiz, jostatzeko beta izan zuten, eurentzako bereziki prestaturiko ekitaldi sortarekin.

Arratsaldeko bostetan hasi zen Musika eta Dantza Jaialdiarekin giroa berotu egin zen, berriz ere. Ehundaka lagun bildu ziren La Platako Klub Atenas aretora eta bertan jarritako eszenatoki handian euskal etxeetako dantza taldeen emanaldiak ikusi ahal izan zituzten. Dantzariek asteak eta kasu askotan hilabeteak zeramatzaten ikuskizun hau prestatzen, dantzak entsaiatzen, jantziak atontzen, La Platara bidaiatzeko dirua biltzen... eta azkenik taulagainean aritzeko ordua heldu zenean, urduritasuna uxatu eta ederki gozatu zuten.

[Paranako Urrundik Euskal Elkarteko dantzarien emanaldia Musika eta Dantza Jaialdiko orijinalenetako bat izan zen (argazkia EuskalKultura.com)]

[Argentinako Euskal Asteko Musika eta Dantza Jaialdia hartu zuen Atenas klubaren panoramika (argazkia EuskalKultura.com)]

[Maipuko Euskal Etxearen dantza taldearen emanaldia 2008ko Argentinako Euskal Asteko Dantza eta Musika Jaialdian, La Platan (argazkia EuskalKultura.com)]

Ikuskizunaren ostean jendea Euzko Etxeako trinketera bildu zen, bertan egi zen herri afariaz gozatzeko asmoz. Afalostean Anne Echegoien Donapaleuko kantariak kontzertua eskaini zuen, bere ahots eder eta euskal kantuekin giro ederra sortu zuelarik. 

[Iparraldetik Euskal Argentina elkarteko 30 bat kide bildu ziren Argentinako Euskal Astearen larunbateko afarira, beste urte batez Hegoamerikako herrialde honetako lagunekin bat egiteko asmoz. Euskal Argentina Argentinara immigratu zuten euskaldunen senide eta lagunek osatzen duten elkartea da eta urtero Euskal Astera bidaia antolatzen du (argazkia EuskalKultura.com)]


[Anne Echegoien Donapaleuko kantariak kontzertua eskaini zuen La Platako Euskal Etxearen trinketean 2008 Argentinako Euskal Astearen barruan (argazkia EuskalKultura.com)]

Argazki gehiago gure Argazki Galerian.