Medellin, Kolonbia. Munduan barrena han-hemenka dabiltza Korrikak euskararen aldeko aldarria eginez bateko eta besteko euskal etxe eta Etxepare Euskal Institutuko irakurletzen bidez gehienbat, baina baita beste batzuetan euskaldun multzo solteek antolatuta. Albiste honetarako atzo bertan Kolonbiako Antioquia eskualdean antolatutako Korrika hautatu dugu, bertatik bidalitako irudiak medio. Azkeneko hitzorduak dira Euskal Herriko Korrika ofizala datorren igandean Gasteizko bere helmugara iritsi aurretik.
Deia Antioquian, bertako Gure Mendietakoak Euskal Etxeak egin zuen, Medellingo Euskadi Ikastetxea lankide, eta eskola honetako eta euskal etxeko ikasle eta kideak izan zituen protagonista. Irudimena lagun, berrehun pertsonatik hurbil, gehienak eskolako ikasleak, aritu ziren pankarta eta petoak soinean ttipi-ttapa, euren lekukotasuna eskainiz Antioquiako hiri nagusian, eskolaren inguruko parajeetan. Zorionak eurei eta eurak bezala munduan zehar euren hondar alea ekarri duten Diasporako ekimen guztiei!
Lagun bati bidali
Komentarioa gehitu
