euskalkultura.eus

Izaba, Nafarroa. 'Kanpoan diren Nafarren Eguna' delakoak honako egitaraua izango du 2014ari dagokion bere XXVI. edizioan:

Aurrekaria gaur izango du, ostirala, ekainaren 13a, arratsaldeko bostetan txangoa abiatuko baita parkinetik Larrako Erreserba Naturalera.

Arratsaldeko zortzietan, Izabako Zineman, Kanpoan Diren Nafarren Egunaren aurkezpena eginen da eta biharamuneko ekitaldien berri emanen da xehetasunez; omenaldia eginen zaio Izabako herriari eta kanpoan diren izabarrei, Fernando Hualderen Isaba en llamas liburua ere aurkeztuz.

Kanpoan Diren Nafarren Eguna, berez, larunbatean hasiko da, ekainaren 14an, goizeko 10:30etan. Partaideak ekarriko dituzten autobusak etorriko dira Ezkiaga Parkinera, harrera egingo zaie eta txistulari taldea lagun Udalaren Plazara bilduko da jendea.

Hamaiketan, kanpaiak joko dira eta meza eginen da San Cipriano elizan, Erronkariko Gaiarre koralak edertua. Ondoren, Izabako alkate Angel Luis De Miguel Baraceren agurra Udaletxeko balkoitik, aurreskuak eta bandera dantzak. Suziria jaurtiko da eta apurrak eta txisturra eskainiko dira.

13:30etan kalejira izanen da herriko fanfarreak alaitua Erminea frontoiraino, bertan izango baita herri bazkaria 14:30ak aldera.

Arratsaldez ekitaldiek aurrera eginen dute, dantzaldia etorriko da 16:30etan, Hiru Behien Zerga, Erronkariko jazkien erakustaldia eta ttun-ttunak arituko dira Pax Avant anfiteatroan 17:30etan. Autobusen abiatzea zazpiak aldera aurreikusi da.

Egunean zehar, 11etatik 18ak arte Cipriano Barace plazan, merkatua ziango da, artisau eta eskulangileak, gaztagileak eta abar Erminea frontoi alboetan. 11etatik 14ak arte, bisita gidatuak herrian interes turistikoa daukaten guneetara, Izabako Museo Etnografikoan amaituz.

Federazioak 30 urte eta liburua

Bestalde, aurten 30 urte bete ditu Nafar Etxeen Federazio Nazionalak eta karia horretara hiru hamarkada horietako berri biltzen duen liburua kelaratu du, testuz zein irudiz. 116 orrialde eta 261 irudi dauzka liburuak eta Arturo Navallas Rebolé-ri zor zaio. Urtebetean egin du, Federazioaren artxiboan gorde eta geratu diren datuak baliatuz.

Liburuaren aurkezpena joan den asteartean egin zen, Nafarroako Gobernuko Kuiltura, Turismo eta Erakunde arteko Harreman kontseilari Juan Luis Sanchez de Muniain, Federazioko eta aldi berean Burgosko Nafar Etxeko presidente Salvador Torres eta Izabako alkate Angel Luis de Miguel bertan zirela. Aurretik, Barcina presidentearen bulegotik pasa, Nafarroako Jauregian, eta hura agurturik ale bat emana zioten.