euskalkultura.eus

Montevideo, Uruguai. Hotza eta euriarekin lehian, eta batez ere futbolaren konpetentziari aurre eginez --Uruguai Kolonbiaren aurka ari zen jokatzen, 2010 urteko Mundialerako sailkatzeko-- Haize Hegoako kideek Juan Mari Beltranen kontzertuak nahi baino jende gutxiago bilduko ote zuenaren beldurra zuten. Ateak ireki eta jendea sartzen hasi orduko arnasa lasai hartu ahal izan zuten, izan ere, jendetza 'harrigarria' bildu zen, eta 'aurreikuspenak aixa gainditu genituen'.

Txalaparta, alboka, txistu, ttun-ttun, burruna eta trikitixaren soinuak entzuteko aukera izan zuten entzuleek, askok lehen aldiz. Baina aurkikuntza entzuleek bakarrik ez, Beltranek berak ere egin zuen. Musikari donostiarraren bokazioa euskal instrumentu zaharrak berreskuratu eta biziberritzea izaki, candombe-a bezalako Uruguiako instrumentu bat ezagutzeko parada ezin zuen galdu. Candombe-a Afrikako esklabuek Ameriketara eraman zuren musika tresna da eta egun Uruguaiko eta beste herrialdetako herri musikaren parte da.

[Juan Mari Beltran eta bere taldeko musikari batzuk Montevideoko emanaldian]

[Juan Mari Beltran ttun-ttuna jotzen]

Kontzertuan giro bikaina egon zen, entzulegoa erabat txundituta eta adi-adi Beltran eta bere musikarien emanaldia jarraituz. Musikari donostiarrak gainera euskal musika tresna zaharrei buruz duen ezagutza entzuleekin partekatu zuen, era natural eta xumean instrumentu edo kanta bakoitzari buruzko azalpenak emanez. 'Juan Mari Beltranek jenderarengana heltzeko era naturala du, umiltasunez eta xalotasunez', azaldu dio EuskalKultura.com-i  Haize Hegoako lehendakari Enrique Poittevin-ek.

[Kontzertuaren beste une bat: Aitor burrunarekin]

[Giro bikaina izan zen kontzertuan: irudian musikariak taulagainean eta ikusle batzuk dantzan]

Euskal instrumentu zaharrak entzuteaz gain, Uruguaiko euskaldunek txalaparta bat nola egiten den ikusteko aukera aparta ere izan zuten.  '(Juan Mari Beltran) hegazkinetik jaitsi orduko zerratoki batera joan ginen, txalaparta egiteko oholen bila. Jendea zur eta lur gelditu zen, makil batzuekin ohol batetik bestera kolpeak emanez zebilen gizon hari begira', azaltzen du Poittevinek. Oholak aukeratu ondoren, Haize Hegoako aretoan eurekin lanean aritu zen musikaria, nahi zuen soinua lortuz doitu zituen arte. Prozesu osoak aho bete hortz utzi zituen Haize Hegoako kideak.  'Ahaztu ezin' izango duten bisita honen hasiera baino ez zen hura.

[Goiko irudian Montevideoko Haize Hegoa Euskal Etxeko kide batzuk Juan Mari Beltran eta bere taldeko musikariekin]