euskalkultura.eus

Buenos Aires, Argentina. Ondo ezagutzen dituen tauletan ospatuko du Joseba Gotzon musikagile bizkaitarrak karreraren 30. urteurrena. Ezaguna da behin baino gehiagotan zeharkatu duela Atlantikoa Hego Amerikako eta batez ere Argentinako publikoarentzat jotzeko. Oraingo bira honetan, ordea, ez da bakarrik etorriko. Izan ere, eta 2012az geroztik hainbat agertokitan egin izan duen bezala, Xoan Curiel konpositore galiziarrarekin batera aurkeztuko da euskal etxeek antolatutako emanaldietan.

Gotzonen beraren hitzak erabiliz, oraingoan dakarren “proposamena gure diskoen kantak abestea eta nobedaderen bat estreinatzea (da). Gure amankomuneko estiloa pop-a bada ere, niretzat bestelako esperientzia da kantautore galiziar batekin aritzea; dibertigarria eta aldi berean sortzeko aukera berriak ematen dituen bestelako esperientzia”, adierazi du musikari euskaldunak.

Bide batez, eta bere zaleak gogoan izanik, 30 urte hauetako errepertorioa errepasatuko du eta plazaratu berria duen Erostisme diskoko kantaren bat ere abestuko du portugaletetarrak.

Joseba Gotzon eta Xoan Curiel artisten Argentinako bira apirilaren 24tik maiatzaren 3ra bitartean burutuko da eta data batzuk baieztatzeke egon arren, seguruenik San Nicolas, Rosario eta Parana hirietan (azken honetan maiatzaren 3an) aurkeztuko dira. Agenda osoari dagokionez, oraindik itxita ez dagoenez, beste euskal etxeren batek biraren parte izan nahi izanez gero, musikariekin kontaktatu behar du josebagotzon@josebagotzon.com helbide elektronikoan.

-Euren biografia, diskografia, bideoak eta berriak: www.josebagotzon.com eta www.xoancuriel.com.