euskalkultura.eus

Donostia-San Sebastian. Irailaren 2an itzuliko gara eguneroko emisioetara, izan ere Estatu Batuetan Labor Day-ko asteburu luzea --astelehen horretan jai egiten dute-- tokatzen denean eta, beraz, Kaliforniako Chinon bertako euskal festak ospatuko dituztenean. Aurten, gainera, bisita berezia izango dute asteburu horretan Chinon, hasia izango baitute euren bidaia Kaliforniara, 'Euskal Artzainak Ameriketan' elkarteak antolaturik, garai batean bertan artzain ibili ziren hainbatek, euren familiekin.

Asteburu horretanxe bidaiatuko dira, baina alderantziz, Ameriketatik Euskal Herrira, Gaztemundu 2013 egitasmoan parte hartuko duten 15 pertsonak. Iraileko lehenengo astelehenarekin ekingo diote eurak ere, Gasteizen, lanari. Gogoratu aurten euren jarduna euskal etxeetan garatzen duten musikarien biltzaile izango dela Gaztemundu... eta gisa berean Diasporako eta Euskal Herriko hainbat lekutan beste hamaika ekimen egingo dira euskal testuinguruan (gure agendan segi ditzakezu).

Guztiak hartuko ditugu hizpide irailaren 2tik aurrera.

Ordura arte, izan ongi, aio.