euskalkultura.eus

Boise, Idaho. Izaskun Kortazar, NABOko Euskara programaren koordinatzailea, eta Henar Chico ikasle/irakaslea dira, Idahoko Boisetik, www.naboeuskaraz.com webgunearen kudeatzaileak: Izaskunek bertan agertzen diren materialak, ikasgaiak eta artikuluak jasotzen ditu; eta Henar webgunea diseinatzeaz eta eguneratzeaz arduratzen da. Bien artean, eta programako irakasle eta ikasleen ekarpenekin, webgune aktibo eta dinamikoa ari dira sortzen. Uztailean abian jarri zenez geroztik, edukin ugari gehitu ditu webguneak, eta internet eta sare sozialen bitartez bertan agertzen diren berri eta deialdiak zabaltzen ari dira.

Izaskun Kortazarrentzat, NABOren programa abian jarri zenez geroztik beharrezkoa zen webgune hau bezalako tresna bat. EuskalKultura.com-i adierazi dionez, "euskara programa gero eta arrakastatsuagoa da eta euskararen egoera hobetzen ari da Ipar Amerikan". Ikasle eta irakasle kopuruak gora egin du azken aldi honetan baina, bere aburuz, zailagoa izango da hazkuntza maila hori mantentzea datozen urteetan. Horregatik da beharrezkoa webgunea, programari buruzko edukinen eta ikasleen bilgune birtuala izan dadin.

Ikasgaiak, loturak, txat-a...

Ikasle gehienek internet bidezko BOGA programa erabiltzen dute, eta, hortaz, www.naboeuskaraz.com webgunea oso erabilgarria ari da izaten beraientzat. Ipar Amerikan, euskal etxeekin harremanik izan ez arren euskaraz ikasi nahi dutenentzat ere abiapuntu polita izan daiteke. Baina... zer aurki daiteke bertan?

Hasteko, une honetan euskal etxe desberdinetan klaseak ematen ari diren Irakasleen aurkezpena eta argazkiak. Ondoren, azken urteetan eman diren Ikasgai batzuk, eta baita ere Online euskara ikasteko baliabideak (Boga eta abar). Umeentzako materialak ere eskaintzen ditu webguneak, hala nola ikastaroetako Multimedia materialak: argazkiak, bideoak, abestiak... Beste atal interesgarri batzuk dira Txat-a (beste euskara ikasleekin online hitz egin eta praktikatzeko) eta Loturak (interneteko hainbat euskara baliabide).

Ikastaroak estatu guztietan

Webgunea abian jarri zenetik badira bertan sartu eta ikastaroetan izena eman duten zenbait ikasle, Henar Chico-k azaldu digunez. Facebook-en ere orria du programak, eta bertan berri eta eduki asko partekatzen dituzte Euskara programako ikasleek. Bi tresna hauen bitartez gero eta ikasle eta ikaslegai gehiagorengana heltzea espero dute kudeatzaileek.

"Euskal etxe batzuk oso aktiboak dira, beste batzuk ez hainbeste. Batzuentzako ez da erraza euskara eskolak antolatzea", dio Kortazarrek. "Programan ikasle gehiagok parte hartzea nahiko nuke; nire helburua euskarak Ipar Ameriketan duen presentzia zabaltzea da. Nire ametsa euskaldunak bizi diren estatu bakoitzean euskara klaseak izatea da".

Amets horretan pauso berri bat eman du programak, eta Facebook-eko komunitatean jakinazari dutenez urtarriletik aurrera Bostonen, Massachussetts estatuan, euskara klaseak hasiko dituzte. Bertan edo beste ikastaroren batean izena eman nahi izanez gero, bidali e-maila hona: izaskunkortazar@gmail.com.