euskalkultura.eus

Iñigo Asensio zuzendaria munduan zehar ibili da, Euskal Herritik urrun bizi diren euskal hiztunak elkarrizketatzen "Euskara Munduan" dokumentalerako. Egunero euskararik hitz egin ezin duten euskaldunek hizkuntzarekin duten harremana aztertzea zen Asensioren helburua. “Gure hizkuntza zein sakon dagoen ikusi ahal izan dut, euskarak nola konektatzen gaituen nortasunarekin, jatorriarekin", esan digu. Etiopiatik Guatemalara, dozena bat testigantza bildu ditu. Datorren abenduaren 3an estrenatuko da dokumentala ETBn, Euskararen Nazioarteko Egunaren karira. Guk trailerra ikusi dugu eta dokumentala ikusteko irrikaz gaude!

Donostia-San Sebastián. Iñigo Asensio zuzendaria jo eta su ari da egunotan, "Euskara Munduan" dokumentalaren muntaian lanean Donostian. Bi urte eman ditu proiektu honetan murgilduta, eta hamabi herrialdetan izan da, bertan bizi diren euskal hiztunak elkarrizketatzen. "Bidaiatzea maite dut, eta aspaldi konturatu munduan euskaldun asko zeudela, uste baino gehiago zirela. Eta ikusi nuen bazegoela zerbait kontatzeko, euskarak mudnuan duen presentzia", agertu dio EuskalKultura.com-i.

Asensio alderik alde ibili zen munduan zehar: Mexiko (DF  eta Ciudad Valles), Guatemala (La Antigua), AEB (Kalifornia), Etiopia (Wukro), Turkia (Istanbul), Alemania (Berlin), Hong Kong, India (Dabardipa), Japonia (Osaka eta Tokyo), Filipinas (Cebú), Australia (Sidney) eta Italia (Erroma). "Toki batzuetan euskaldunak elkartu egiten dira, herrimina sendatzeko euskaraz hitz egiteko edozei auekra txiki aprobetxatzen dute. Beste batzuek ez dute aukerarik ordea. Adibidez Indian 20 urte daramatzan Igancio Galdors misiolaria, edo Etiopian dagoen Angel Olaran, hau ere misiolari. Han etiopar umeak dira euskarazko hitzak ikasten saiatzen direnak, badakitelako hori dela Angelen hizkuntza, ez gaztelania", azaldu du zuzendariak. 

"Kasu batzuetan haiekin egun batzuk euskaraz hizketan pasa behar izan nituen, praktikatzeko, askatzeko. Baina berehala bueltatzen zen dena, gehienek euskara oso barruan dute", gehitu du Asensiok.

Euskara, zuzendariaren aburuz, jatorrira, haurtzarora bidaiatzeko modua da euskaldun hauentzat eta euren nortasunarekin konektatzen ditu. Mexikon, esaterako, Gurutzne Etxeberria euskara irakasleak kontatu zion bere ikasle bat amonarekin hitz egin ahal izateko hasi zela euskara ikasten. Amona Alzheimerrak jota dago, eta dena ahaztuta, euskarara bueltatu da. "Ilobak euskara ikasi nahi zuen amona ulertzeko, egunon, maite zaitut esateko",  kontatzen du Etxeberriak trailerrean.

"Eta gogoan dut Australian bizi den emakume bizkaitar batek nola esan zidan Euskal Herrira bueltatu nahi zuela, ze, zahartu ahala dena ahaztuko omen du, ingelesa ere, eta orduan zer agertuko da? Neure berbi, esan zidan, bizkaitarrez", gogoratu du Asensiok. Bere hizkuntza, bere muina, euskara.

Dokumentala ETBren sostenguarekin egina da eta ETBn estrenatuko da Abenduaren 3an, Euskararen Nazioarteko Egunean. Bitartean, hemen duzue aurrerapen bideoa:

EUSKARA MUNDUAN (AURRERAPEN BIDEOA) from Iñigo Asensio on Vimeo.