euskalkultura.eus

Trois Pistoles, Québec. Larunbatean heldu ziren Trois Pistoles herrira Indianoak 2013 espedizioko kideak; gehienak Angelutik, hainbat orduko bidaia eta hegaldiaren ostean; beste zenbait Montrealetik eta azken biak New Yorketik ere. Proiektu honek hainabt lekuetako euskaldunak eta euskaldunen lagunak bildu ditu: batetik, ekimena abian jarri zuten Lapurdiko Ibaialde elkarteko kideak, eta Atlantikoaz bestalde, eurekin bat egin zuten Quebeceko euskal etxeko lagunak. Amaitzeko, Trois Pistoles-en Miq'mak herriko famili bat bildu da arraunlari taldera eta, New Yorketik, hango Euzko Etxea elkarteko bi lagunek ez dute traineru honen tostarteko izateko aukera galdu nahi izan.

Asteburuan Trois Pistoles herriko Parc de l'Aventure Basque en Amerique museoan kultur egitarau oparoa egin zuten, espedizioari agur egiteko. Montrealetik Euskaldunak Euskal Etxeko 20 kide bildu ziren bertara. Elkarteko presidente Adelaide Daraspek ekitaldien berri eman digu.

[Euskaldunak elkarteko Ernest Behaxateguy eta Adelaide Daraspe, bizkarrez, Trois Pistolesen trainerua herritarrei erakusten (argazkia Indianoak2013)]

Abiatu baino lehen, Miq'mak herriko kideek trainerua babesteko zeremonia antolatu zuten. "Oso berezia zen. Landare batzu erre dituzte eta bakoitzaren gainean kea ematen zuten. Hori egiten zuen emazte haurdun zen eta jantzi tradizionalak zituen soinean", azaldu du Daraspek. "Bere senarrak,  orain dela mende batzu izan diren euskaldunen eta amerindiar populuaren arteko elkartrukeak aipatu ditu".

[Paula Charron, espedizioko patroia, Miq'maktarren zeremonian (argazkia ADaraspe)]

Ondoren trainerua babestu zuten kantu amerindianoak kantatuz eta traineruko arraunlariei ere zeremonian parte hartzeko gonbitea egin zieten. "Azkenik trainerua inguratu dugu denok eskuak emanez eta elgarrekin kantatu dugu, ta bakoitza YO TO NO oihukatu behar zuen harnasa behin hartuz eta ahal bezain luzaz atxikiz". Horren ondotik, trainerua uretaratu eta abian jarri zen Indianoak 2013 espedizioa.   

Ibilbideko lehen txanpan Euskaldunen Irlara bisita egin zuten arraunlariek. Isla honetan dira XVI. mendeko bale arrantzaleek egin zituzten hiru labeak. Astelehenean, goizeko bostetan abiatu zen trainerua Trois Pistoles-etik eta arratsaldeko hiruetan heldu zen Tadoussac herrira. Tarte honetan tostartean izan ziren zenbait arraunlari gonbidatu, horien artean Adelaide bera eta New Yorkeko Iker eta Mintxo. 

[Arraunean Saint Laurence ibaian Ile des Basque edo Euskaldunen Uhartera bidean (argazkia Indianoak2013)]

"Biziki teknikoa da eta ez batere hain errexa... Arraunaren inklinazioa, erritmoa, gorputzaren mugimendua... eta St Laurent ibaia ainitz mugitzen denez uholde ttikiak ere baziren", agertu du Daraspek. "Lehen ateralditxo hortan, foka bat ikusi dugu. Bere burua uretik ateratzen zuen gu ikusteko. Bikaina zen!"

Espedizioko kideek elkartearen Facebook orrira igotzen dituzte eguneko argazkiak eta kontakizunak. Bidaia egunean egunean jarraitu nahi dutenek, nahikoa dute hemen sartzea esperientzia eder honetako partaide sentitzeko.

Proiektuari buruzko informazio osoa, www.indianoak.fr webgunean.