euskalkultura.eus

Donostia-San Sebatián. Ikerbasque Fundazioak, Eusko Jaurlaritzak Euskal Herriko ikerketa-gaitasuna sustatzeko sortutako fundazioak, goi-mailako ikerlariak kontratatzeko deialdi berri bat egin du. Deialdi honen helburua ikerkuntza alor desberdinetako talentua Euskadira ekarri eta profesional hauek euren ikerketak bertan burutu ditzatela da. 

Deialdian parte hartu nahi dutenek 2007ko urtarrila baino lehen egina behar dute izan doktore tesia. Bi taldetako ikerlariek parte hartu ahal izango dute: batetik, atzerrian aritu direnak (edo, gehienez, azken hiru urteetan Espainian 12 hilabetez ibiliak), eta bestetik, ikerketak Euskadin egin dituztenak, baina lanpostu finkorik ez dutenak. 

Fundazioak azaldu duenez, kanpoko batzorde batek aztertuko ditu hautagaitzak eta, ikerlari bakoitzaren meritu pertsonalarekin batera, garatzen ari den ikerketak Euskadin egiten ari den ikerkuntzan izan dezakeen ekarpena baloratuko dute. Deialdiak Europar Batasunaren laguntza du, SMARTbrain egitasmoaren barruan. Informazioa gehiago, Ikerbasque-n webgunean: www.ikerbasque.net.