euskalkultura.eus

Pellegrini, Argentina. Magdalena Mignaburu pozik agertzen da 'Gure arropa - Nuestra ropa' erakusketak Pellegrini-n izan duen harrerarekin. Hezitzaile eta ikertzaile euskal argentinarrak prestatu duen erakusketan Euskal Herriko zazpi probintzietako 20 bat jantzi historiko biltzen dira. Inaugurazioa joan den astelehenean egin zuten, hiriko agintariak bertan zirelarik. Egun bereziena, baina, asteartea izan zen, herriko eskoletako umeak izan zirelako bisitari.

"Zoragarria izan zen! Adin desberdinetako neska-mutilak etorri ziren, irakasleekin. Talde bakoitza heltzean, azalpentxo batzuk ematen nizkien, adinaren arabera azalduz erakusketako jantziei buruzko hainbat berezitasun, euskaldunak nortzuk garen eta non bizi garen", aipatzen du Mignaburuk.

[Ikasle talde bat Magdalena Mignabururen azalpenak entzuten, erakusketa ikusi aurretik (argazkia MMignaburu)]

Erakusketa ikusmiratu ostean eta jantziak gertutik ikusita, ikasleek hainbat galdera egin zizkioten Mignabururi. "Bukatzeko, bakoitzari bere abizena galdetzen nion eta batzuei euskal jatorria zutela azaldu nien", dio. "Oso pozik joan ziren, izan ere, etxera heldu zirenean, askok gurasoei erakusketa ikustera etortzeko esan zieten, eta horrela agertu ziren zenbait guraso ere".

[Haur hauek euskal jantziak jantzita agertu ziren eta lore sorta bat oparitu zioten Magdalena Mignabururi. Euren amak horrela agertu nahi izan zion ikertzaileari bere esker ona euskal etxe bat sortzeko hainbat aholku eta argibide emateagatik]

Bisitari bakoitzak erakusketari buruzko folleto bat jaso zuen, eta baita ere interneteko webgune zerrenda bat, gaiari buruz sakondu nahi duenarentzat. EUSKALKULTURA.COM webgune horien artean agertzen da.

Erakusketa euskal etxeetara eramateko prest agertzen da Mignaburu, eta berarekin harremanetan jarri nahi duenak e-maila idatz diezaioke helbide honetara: aurrera55@hotmail.com. Erakusketak Pehuajo-ko Euskal Etxean zabalduko ditu orain hurrengo ateak, hilabete honetan bertan, Aberri Eguneko ospakizunen barnean.

Erakusketari buruzko informazio gehiago, Magdalena Mignabururen webgune berrian: www.mignaburu.com.ar.