'Ikasle Euskal Herrian, irakasle diasporan'; euskal komunikabideak euskara ikasle argentinarrei galdezka

Uruguaitik eta Argentinatik etorritako 23 lagun hango euskal etxe eta unibertsitateetan euskara irakasle izateko trebatzen ari dira Lazkaoko (Gipuzkoa) Maizpide barnetegian. Euskal Herriko komunikabideak, euskarazkoak gehienbat, etengabe ari dira Lazkaora hurbiltzen, Diasporako seme-alaba diren hauen euskaltzaletasuna ulertu nahirik. Maitasun istorioak dira gehienak, norberaren erroekiko, familiarekiko maitasun istorioak, bizipen pertsonalenekin lotuak. Erroak fruitua ematen, jende gaztea baitira Ameriketatik etorritako euskaldunok. Ainara Arratibelen artikulu hau Berriak eman zuen argitara joan den igandean.

Ainara Arratibel/Lazkao, Gipuzkoa. Andres Monteagudo, Dario Rodriguez, Alicia Itcea, Maria Elena Etcheverry, Maria de los Angeles Garcia eta Rocio Basterra argentinarrak dira. Han udako oporretan daudela aprobetxatuz Euskal Herrira euskara ikastaro trinko bat egitera etorri diren ikasleetako batzuk dira. Eusko Jaurlaritzako Hizkuntza Politikarako Sailburuordetzak kudeatzen duen Irakurlego eta Helduen Alfabetatze eta Berreuskalduntzeko Erakundeak (HABE) abian jarritako Euskara munduan programei esker etorri dira. «Guretzat aukera aparta da ordenagailuaren, sarearen urruntasuna utzi eta euskara Euskal Herrian bertan ikastea. Programari ekin genionean ez genuen espero hona etortzeko modua izango genuenik», zioten iritsi zirenean.

Dagoeneko aste batzuk daramatzate Lazkaoko Maizpide barnetegian, eta hasierako ilusioari eutsiz, euskara ikasteaz gain haren egoera nolakoa den ikusteko abagunea izan dute. Jende askok ikaragarrizko meritua dutela esaten diete euskara ikasteagatik. Haiei, ordea, ez zaie hala iruditzen. «Guretzat harrigarriena zera da, hemengo batzuek euskara beharragatik ikasten dutela ikustea: lana topatzeko, esaterako», dio Monteagudok, ikasleetako batek. Beren sorterriko euskal etxe guztietan euskara ikasteko aukera izatea da haien ametsa.

2004ean ia hutsetik hasitako taldea

2004. urtean hasi ziren ia hutsetik euskara ikasten hango euskal etxeetan, Boga autoikaskuntzako Interneteko sistema eta Euskal Herriko euskara irakasleek egindako tutoretzak baliatuz. Maizpideko irakasleei egindako ariketak bidali, eta zuzendu egiten zizkieten. Horri esker, HABEren curriculumeko lehen maila lortu zuten.

Orain, ordea, euskararekiko erakutsi duten konpromisoari eutsi, eta beste urrats bat egin nahi izan dute. Unibertsitate nahiz euskal etxeetan eskolak emateko prestatzen ari dira. Etcheverryk nabarmendu duenez, hiriburuan ez dute euskara ikasteko arazorik; hainbat herri eta eskualdetako euskal etxeetan, ordea, irakasleak falta dituzte. «Ni, adibidez, hiru euskal etxetan aritzen naiz irakasle. Astebururo goizaldeko lauretan jaikitzen naiz, eta 300 kilometro egiten ditut autobusez, eskolak ematera joateko. Nekagarria da, baina pozik eta gustura egiten dut, gainontzean han ez bailitzateke euskara ikasteko modurik izango», azaldu du Basterrak. Hain zuzen ere, irakasle gabezia horri aurre egiteko jarri zuen abian HABEk, besteak beste, Boga autoikaskuntza sistema. 2.000 ikasle inguru ari dira euskal etxeetan euskara ikasten, eta Maizpiden dauden antzera, asko dira irakasle izateko prestatzen ari direnak.

'Mingaina askatzea falta zaigu'

Eskolak ahalik eta txukunena emateko eta euskara hobetzeko ari dira prestatzen Maizpiden. Horretarako, nahiz eta Lazkaoko familia batzuen etxeetan bizi, ia egun osoa barnetegian ematen dute: 09:00etatik 18:30era. Gramatika baino, mintzapraktika lantzen dute gehiago. Asko eskertzen dute guztiek hori. «Internet bidez ikasi dugunez, ia ez dugu mintzapraktikarik egin. Gainera, esan bezala, han ez dugu aukera askorik euskaraz hitz egiteko. Mingaina askatzea falta zaigu», nabarmendu du Basterrak. Ahalik eta etekin handiena atera nahi diete eskolei: «Horretarako aukera izan ez dutenentzako errespetu falta litzateke hala ez egitea, eta baita geure burua engainatzea ere». Eskolatik kanpoko ekintzak ere baliatzen dituzte trebatzeko. Batzuei, ordea, ez zaie erraza egiten. Itceari, adibidez, kosta egiten zaio elkarrizketak jarraitzea: «Jendeak oso azkar hitz egiten du. Gainera, ez du batuan egiten. Batik bat euskaldun zaharrekin gertatzen zait hori».

Zailtasunak zailtasun, beren sorterrira itzultzean HABEren curriculumeko bigarren maila lortuko dute bi hilabeteko ikastaro trinkoa egiten ari diren 14 ikasleek, eta egonaldi luzeagoa egiten dabiltzan beste bederatziek hirugarrena, euskararen gaitasun agiriaren (EGA) parekoa.

Euskal Herritik gertuago

Gehienak beren arbasoak Euskal Herrikoak zirelako hasi ziren euskara ikastean: «Haiengandik gertuago sentitzen gara euskara ikasten dugunean. Haien nondik norakoak ezagutzeko bidea ematen digu euskarak. Hemengo jendearentzat ez duen balio erantsia du guretzat euskarak», iritzi dio Rodriguezek. Badira, ordea, beste zaletasun batzuen ondorioz hasi zirenak euskara ikasten. «Euskal dantzak ikasten hasi nintzen, eta euskal etxekoek euskara ikasten hastera animatu ninduten», dio Garciak.

Orain, beren arbasoen hizkuntza ikasteko aukera izateaz gain, haien sorterria bertatik bertara ezagutzeko aukera dute. Dagoeneko egin dituzte txangoak Gipuzkoako eta Lapurdiko kostaldera. «Paisaia zoragarriak daude hemen, Argentinako Mendozakoak gogorarazten dizkit». Donostiako danborrada nahiz Bertso Egunarekin gozatzeko aukera ere izan dute batzuek. «Bertso guztiak ez genituen ulertu, baina ederki pasa genuen», gogoratu du Etcheverryk. Eta, nola ez, Lazkao Txiki nor zen jakin dute.

ROCIO BASTERRA, Irakaslegaia:
«Astebururo 300 kilometro egiten ditut eskolak
emateko. Nekagarria da, baina pozik egiten dut»

ANDRES MONTEAGUDO, Irakaslegaia:
«Batzuek euskara beharragatik ikasten dutela
ikustea da guretzat harrigarriena»

DARIO RODRIGUEZ, Irakaslegaia:
«Euskal Herritik, gure arbasoengandik gertuago
sentitzen gara euskara ikasten dugunean»

(2008-02-03an Berria-n argitara emana)

Lotura interesgarriak

Lazkaoko Maizpide barnetegia

'Euskara ikasteko beharra sentitzen dut'
2008ko urtarrilaren 28an EuskalKultura.com-en argitara emana

Maite Iturre, argentinarra: 'Zientzia Politikoak ikasi ditut euskaraz'
2007ko abenduaren 4ean argitara emana

Argentinako 25 euskara irakasle-ikasle trebatuko dira Lazkaon
2007ko azaroaren 27an argitara emana

euskalkultura.eus

Albisteak

'Ikasle Euskal Herrian, irakasle diasporan'; euskal komunikabideak euskara ikasle argentinarrei galdezka

Irakurrienak

Azken komentarioak