euskalkultura.eus

Bilbao, Bizkaia. Ibaizabal argitaletxeak sustatzen du www.ibaimusic.com ataria eta bertan euskal musika "ia guztia" bildu eta internet bidez eskuragarri jartzea da sustatzaileen helburua. Agustin Oiarzabal arduradunak EuskalKultura.com-i azaldu dionez Diaspora oso gogoan izan dute sortzaileek hasieratik eta euskal musika munduko edozein bazterretik erosteko eta deskargatzeko aukera ematen du webguneak. Baina ez hori bakarrik: euskal musikaz gain musika klasikoa, jazz, folk, munduko beste herrialdetako musikak... aukera zabala dago webgunean une honetan dituzten 7.000 diskoen artean. Eta aurki kopuru hori bikoiztu egingo da gainera, Oiarzabalek baieztatu digunez. 

Kantuak zein diskoak bi formatutan erosi eta deskarga daitezke: mp3 formatuan edo FLAC delakoan (Free Losseles Audio Codec). Azken honek kalitate hobea eskaintzen du eta horrek eragina du prezioan: mp3 formatuan abesti bakoitza 0,99 eurogatik jaitsi daiteke, eta disko osoek 8,99 euro balio dute; FLAC formatuan, berriz, abestiaren prezioa 1,19 eurokoa da eta disko osoarena 10,99 euro. Disko osoa erosten duenak disko horren azala, letrak eta kredituak ere jaitsi ahal izango ditu. Erosketak kreditu txartelaren bidez ordaindu ahal dira.

Gabonetan, musika oparitu

Eguberriei begira, baina urte osoan zehar erabilgarri, Ibaimusic.com-ek oparitzeko bonoak eskaintzen ditu. Sistema honi esker 10, 20, 30 40 edo 50 euroko bonuak oparitu daitezke, jasoko duenak erabaki dezan zer disko edo abesti erosi. Erabilera oso erraza da: opari bonua erositakoan, sarrera kode bat ematen da, eta hori erabilita oparia jasoko duenak musika eta abesti gogokoenak aukeratu eta erraz deskarga ditzake.

Bestela, Ibaimusic.com-eko aukera zabalean ikusmiratzen hasteko lasterbide batzuk Euskal Musika atalean begiratzea edo Salduenak rankinga bilatzea dira. Beste aukera bat Eskaintzak edo Gomendatuak atalak izan daitezke. 

Diasporarekin harremana

Sortu zenez gerotik, Ibaimusic-ek oso kontuan izan du Diaspora eta Oiarzabalek azaldu duenez badira atzerritik musika erosten duten bezero asko. "Bezero gehienak Argentinakoak eta Mexikokoak dira, eta baita beste herrialde batzuetakoak ere: Estatu Batuak, Peru... Herrialde hauetako euskal irratsaioek ere eskatzen dute musika, adibidez Rosarioko 'Palabra de Vasco' argentinarrak".

Bestalde, atariak tarte berezia eskaintzen die euren musika salgai jarri nahi duten taldeei eta Oiarzabalek agertu duenez, Ibaimusic Boiseko 'Amuma Says No' eta Argentinako 'Baietz' taldeekin ari da hizketan, euren musika katalogora ekarri nahian.

-Informazioa gehiago, Ibaimusic.com webgunean, hemen