euskalkultura.eus

Marcos Paz, Argentina. Mota askotako proposamenak eskaini zikieten Buenos Aires probintziako Marcos Paz herriko Gizataldeen ordezkariek jaira hurbildu ziren lagunei: erakusketak, kontzertuak, dantzaldiak, janari tipikoak eta artisau-azokak. Euskaldunak ez ziren hor batere atzean geratu.

[Maral Talde arrecifestarrak Marcos Paz-eko 11. Immigrantearen jaia itxi zuen]

Jaialdia bertako Etorkinen Monumentu eta tren geltoki inguruko onibarretan egin zen. Hor berton Euskal Herriko kanta ezagunenak entzun ziren Maral Taldearen ahotsetan. Marcos Paz-eko euskal etxeko kideek gonbidaturik, musika talde arrecifestarrak Lau teilatu, Eperrak, Ilargia eta Ikusi mendizaleak interpretatu zituen. Bitartean, pantaila batean “Euskal Herria lau haizetara” saileko dokumental bat ari zen proiektatzen.

[Mariana Dominek eta Christian Rodriguez-ek txalaparta jo zuten]

Horretaz gain, nobedade bat gehitu zion Mariana Domine Irigoyen (ahotsa), Christian Rodriguez (perkusioa), Billy Vogt (gitarra eta koruak), Seba Rocchi (baxua), Charly Oviedo (teklatua eta koruak), Alexis Valeria Cozza (gitarra) eta Eugenia Cozza (koruak) partaide dituen taldeak euren aurkezpenari: Mariana Dominek eta Christian Rodriguez-ek txalaparta jo zuten.

[Beste abesti batzuen artean, Maral-ek Lau Teilatu interpretatu zuen]

Arrecifesko taldeak jaialdia ixteko ardura izan zuen eta poz pozik geratu ziren publikoaren erantzuna eta euskal etxeko kideen harrerarekin. “Marcos Paz-eko euskaldunak lan handia egiten ari dira; izan ere laster lege nortasuna aterako dute.  Primeran hartu gintuzten, oso talde aktiboa dira, oso jatorrak, atseginak baino atseginagoak” adierazi diote Maral Taldeko kideek EuskalKultura.com-i.