euskalkultura.eus

Tres Arroyos, Argentina. Abuztuan ekin zioten berriro urteko egitarauari Hiru Erreka euskal etxeko lagunek eta Orreagaren eguna nahiz Sanferminak ospatu zituzten, baita Argentinako Independentziaren eguna ere. Urriaren 10ean, berriz, eta dantza taldearentzat dirua lortzeko, herriko erdigunean Janari Azoka muntatu zuten. Bildutako diruari esker, Hiru Errekako dantzariek Bahia Blancan datorren astean egingo den euskal astean parte hartzeko aukera izango dute. 'Eta oso garrantzitsua da guretzat, Euskal Asteko galan izango garen lehenengo aldia baita', azaldu dio EuskalKultura.com-i Jose Luis Artuch, Hiru Errekako lehendakariak. Tres Arroyoseko taldea oraindik aski handia ez denez, Macachingo neska batzuekin osatuko da larunbat gauean aurkeztu ahal izateko.

Claromecokori dagokionez, eta eguraldi kaskarra gorabehera, Hiru Errekako kideak bertako Gizataldeen Azokan izan ziren. Izan ere, inguruko herrietako mugimendu kulturaletan lagungarri ohi dira Tres Arroyosekoak eta aurten ere kostaldeko aipatu herrira hurbildu ziren. Euskal Herriko standean janari tipikoak --tartean hestebeteak, urdaiazpikoak eta tortilak-- eta abizenen buruzko informazioa topatu ahal izan zuen, besteak beste, bisitariak.

Beste alde batetik, agerian da Tres Arroyosko Euskal Etxeko arduradunak bereziki pozik dabiltzala azken asteotan, "pozik egoteko benetako arrazoi ona daukagulako", diote. Hiru Errekak, duela hilabete pare bat, bere egoitza berria altxatzeko lursaila erosi zuen eta nahiz eta oraindik paperak eta tramiteak egiten ari, etxearen proiektua dagoeneko eginda daukate. 'Orubea ez dago erdigunetik urrun', azaltzen du Jose Luis Artuchek; 'are gehiago, herriko jai garrantzitsuak egiten diren lekutik 50 metrora soilik', diosku.