euskalkultura.eus

Buenos Aires, Argentina. Argentinako hainbat euskal etxe eta erakundek hartu dute parte Buenos Aireseko Laurak Bat euskal etxeak antolatutako, Buenos Aires celebra (Buenos Airesek ospatzen du) jaialdian. Hiriburuko Udalaren deitzaile eta babesle, Mayo Etorbidean gauzatu zen erakustaldia abuztuaren 28an, eguerdiko 12tik iluntzeko 6ak arte. Arratsaldean zehar milaka bisitari mugitu ziren stand, txosna eta agertokien artean, bertaratutako Euskal Herriko kultur adierazpen guztiez gozatuz. EuskalKultura.com ere egon zen, presente eta partaide, euskaldunen jai honetan eta, ohi bezala, gure irakurleekin partekatu nahi dugu ekitaldia ondoko argazki-erreportajearen bidez. Hona hemen egunaren laburpenaren I. zatia:

[Euskal Echea Institutuetako ikasleek eta euskal etxeetako gazteek hartu zuten 'Buenos Airesek ospatzen du' jaialdiari hasiera emateko ardura. Kabalkadan hurbildu ziren dantzariak agertoki nagusira. Han Hiriko musika bandak Argentinako Ereserkia jo zuen. Kabalkadaren aurrean, Euskal Echea Institutuetako banderadun eta agintariak (argazkia EuskalKultura.com)]

[Euskal jai guztietan ohi bezala, honetan ere dantzek izan zuten beren leku berezia. Jaialdia hasi bezain laster, euskal dantzak ikusgai aurkeztu ziren Casa Rosadaren aurrean kokatuta zegoen agertokian (argazkia EuskalKultura.com)]

[Euskal etxe ugarik hartu zuten parte dantza erakustaldian, tartean, Buenos Airesko Eusko Ekintza eta Emakume Abertzale Batzak, Cañuelasko Denak Bat-ek, Buenos Airesko Eusketxe-k, Arrecifesko Euskaldunak Denak Bat-ek, La Platako Euzko Etxea-k, Jose C. Pazko Toki Eder-ek, Chascomusko Zingirako Euskaldunak-ek, Lomas de Zamorako Denak Bat-ek eta Euskal Echea Institutuek. Irudian Ekin Dantzari Taldea (argazkia EuskalKultura.com)]

[Bigarren agertokia, Mayo etorbidearen eta Chacabuco kaleen gurutzean zegoena, txikia geratu zitzaien euskal dantzariei; baina berehala konpondu zuten eta oholtzatik jaitsi eta kalea hartu zuten euren dantzak egiteko. Irudian, Buenos Aireseko Acción Vasco-ko dantzariak (argazkia EuskalKultura.com)]

[Lehenengo stand-a erakundeetakoa zen. Hor bildu ziren Argentinako euskal erakundeetako agintariak. Irudian, FEVAko idazkaria den Marta Abarrategui stand atzetik irriño batez atenditzen(argazkia EuskalKultura.com)]

[Lehenengo stand-ean ere Elvira Kortajarena Argentina, Brasil, Paraguai eta Uruguairako Euskadiren Ordezkaria, San Juango euskal etxeko kideekin (argazkia EuskalKultura.com)]

[“Ez al dakizu euskara dela euskaldun egiten gaituena…?” esaten du abestiak. Eta ideia hori bisitari guztiekin konpartitzeko, euskara standean euskal hitz eta esaldi batzuk ikasi ahal izan zituzten bertara hurbildu ziren buenosairestar ugariek (argazkia EuskalKultura.com)]

[Buenos Airesen euskara irakasten duten erakundeetako ordezkariak izan ziren hizkuntza standeko arduradunak (argazkia EuskalKultura.com)]

[Proposamen guztien artean, euskal sukaldaritzarena ere oso arrakastatsua suertatu zen. Pintxoak eta paella izan ziren faboritoak. Irudian Euskaltzaleak-eko txosna (argazkia EuskalKultura.com)]

[Laurak Bat euskal etxeko jatetxeak Mayo etorbidean ere plater onenak eskaini zizkien bertaratutakoei (argazkia EuskalKultura.com)]

[Deigarria bezain gozoa izan zen San Nicolas-eko Euskal Etxeko kideek prestatutako paella (argazkia EuskalKultura.com)]

[Euskal sukaldaritza ederki ezagutzen duten chef adituek klase bat eman zioten publikoari. Itziar Agirrek, Choly Berreteagak eta Arantxa Soralucek euren sekretuetako batzuk partekatu zituzten bigarren agertokira hurbildu zirenekin (argazkia EuskalKultura.com)]

 [Donostiako soinuak ere entzun ziren Buenos Aireseko kaleetan, borondate onenaz jotako danborrada medio (bideoa EuskalKultura.com)]