euskalkultura.eus

Nafarroan sartu da Korrika eta datozen bi egunetan herrialde honetan barrena ibililko da lasterketaren lekukoa. Baina Euskal Herriko mugaz haratago ere zabaldu da azken egunetan euskararen aldeko mezua, esaterako, Argentinako Necochean, Liverpoolen, Madrilen edo Kolonbiako Medellinen. Eta datorren astebururako ere badatoz beste hamaika hitzordu. Jarraian, bideoak eta argazkia sorta.

Donostia-San Sebastian. Euskal Herrian bidea egin ahala, Korrika munduan zehar ere ari da arrastoa uzten, eta handik eta hemendik dozenaka argazki heldu zaizkigu, Diasporako euskaldunek egiten dituzten ekitaldienak. Apurka-apurka horien guztien berri ematen saiatuko gara, irudi ederrak direlako eta euskal etxeek euskararen alde egiten duten eguneroko lan isila Euskal Herrian ezagutzera emateko aukera bikaina direlako.

Argentinako Necochean, esaterako, Korrika 19 elkarteak hainbat urtetan euskal kulturaren alde egindako lanaren erakusgarri izan da. Aurtengo lasterketan parte hartu dutenen artean euskal etxeko nagusiak izan dira, batzuk elkartearen sortzaile izandakoak, eta sasoi betean euskararen alde ekinean jarraitzen dutenak. Kasta itzela, Necocheako gaztetxo hauek! Eta lekukoa hartzeko prest, makina bat neska-mutil ere ikusi ditugu korrika!

Berlinen ere, lasterketan nagusiak eta txikiak aritu ziren, Neukolln auzoan barrena. Lekukoa eskuz-esku ibili zen: Berlinen bizi diren guraso euskaldunen haurrek eraman zuten lehenbizi. Gero, bertan euskara ikasten ari diren ikasle alemaniarrek. Azkenik, Gernika Deutsch-Baskischer Kulturverein euskal etxeko kideek. 

Madrilen ere hiriko euskara ikasleak eta euskal etxeko kideak pozik lotu zitzaizkion lasterketari, euskal etxean amaitu zen ekitaldi ederrean. Gurera ekarri ditugu bertako zenbait argazki, baina galeria osoa ikusteko jo Artzai Jauregi argazkilariaren Facebook orrira.