euskalkultura.eus

Berriozar, Nafarroa. Stephane Hessel 93 urteko agure 'gaztea' da eta 'Indignez-vous!' liburuarekin Frantziako gazteei zuzendu dien matxinada baketsuareko deiak oihartzun zabala izan du mundu osoan. Hesselen biografia zirraragarriak bere mezuaren indarra sendotu baino ez du egin: Frantziako Erresistentziako kide izan zen eta naziek atxilotu, torturatu eta Buchenwald-eko zigor-esparrura eraman zuten. Handik birritan egin zuen ihesi. NBEren funtzionarioa zela, 1948an, Giza Eskubideen Adierazpen Unibertsalaren hamabi idazleetako bat izan zen.

Joan den abenduan, munduaren egoera kaxkarra ikusita, 13 orri baino ez dituen 'Indignez-vous' liburuxkarekin Hesselek matxinadarako deia egin zien gazteei. Bere esanetan erresistentzia mugimenduen bitartez XX. mendean zehar lorturiko aurrerapen ugari konturatu orduko galdu egin dira XXI. mendeko lehen hamar urteetan. "Diruaren boterea" ez omen da inoiz izan "hain handia, hain lotsagabea eta hain berekoia" dio.

Haserretzeko arrazoi ugari badirela dio Hesselek eta honako deia egiten die gazteei: "Guk, Frantzia librearen alde borrokatu ziren indarretako eta erresistentzia mugimenduetako beteranook, belaunaldi gazteei egiten diegu deia, Erresistentziaren herentzia eta helburuak biziberritu eta heda ditzaten. Hau esaten diegu: hartu lekukoa, haserretu zaitezte".

Euskarazko eta gaztelaniazko bertsioak, buruz-buru

Joan den asteko ostegunean plazaratu zuen liburuaren euskarazko bertsioa Denonartean argitaletxe nafarrak. Gaztelaniazkoa apenas bi egun lehenago heldu zen liburudendetara. Enrike Hualde editoreak urtarrilean izan zuen liburuaren berri eta Frantziako 'Indigéne' argitaletxearekin harremanetan jarri zen berehala, euskarazko eskubideak erosteko.

"Orrialde gutxiko liburua da, baina oso sakona", azaldu dio EuskalKultura.com-i Hualdek. Gizarteari orokorrean egiten dion ekarpenaz gain, Hualderen aburuz Euskal Herriak egun bizi duen egoerari ere ekarpena egiten dio, matxinada baketsu bat egiteko deiarekin.

Inma Errea izan da liburuaren itzultzailea eta momentuz 1000 aleko lehen tirada bat plazaratu du argitaletxeak. "Liburudendetara ari dira iristen oraindik liburuak, baina bezeroek aurretik ere galdetzen zuten liburuaz eta aurki bigarren tirada bat egitekotan gara", dio Hualdek. Liburuxkak bost euro balio ditu eta Denenoartean argitaletxearen webgunean ere eros daiteke, hemen.