euskalkultura.eus

Hanburgo, Alemania. Hanburgoko Cervantes Institutuak euskara ikastaro bat abiatu nahi du eta ikasle bila dabil. Hori dela eta, euskara lantegi ireki bat egin zuen larunbatean, hizkuntza honetan interesa dutenei ikastaroa zer nolakoa izango den erakusteko. Isabel Marin Arrizabalaga izan zen lantegiaren gidaria eta ordubetez, euskal hizkuntzari buruzko azalpentxoa eman zien bertara bildu ziren sei lagunei. Horrez gain, kanta bat entzun eta elkarrizketa errazak praktikatu zituzten ikasleek.

Lantegi ireki hau Hanburgoko Cervantes Institutuak aurten egiten duen bigarrena da. "Lehenengora zazpi lagun etorri ziren, gaztelaniaz zekitenak, estatu espainolekoak eta alemanak. Musikarekin batera hizkuntzaren historia eta ezaugarri etimologiko eta gramatikalak azaltzeaz gain, elkarrizketa eredu errezekin aritu ginen", azaldu dio EuskalKultura.com-i Isabel Marinek.

Isabel Marin euskal filologia ikasitakoa da eta Euskadi Irratiko berriemailea da Hanburgon. Hogei urte daramatza Alemanian, etorkinei alemana ikasten eta unibertsitatean gaztelania irakasten. Orain, Cervantes Institutuan ikasle talde nahikoa handia bilduz gero, euskara irakasle ere jardungo du. "Talde bat sortzekotan, astean behin euskarazko klasea emango litzateke Hanburgoko Cervantes-en", iragarri du.

-Izena emateko, jo Hanburgoko Cervantes Institutuaren webgunera.