euskalkultura.eus

Buenos Aires, Argentina. Euskal Herriko kultur adierazpen ugari ezagutu ahal izan zituzten joan den igandean Buenos Airesko Mayo Etorbidera bertaratu ziren lagunek. Festak helburu argia zeukan: euskal etxe barruetan egiten diren ekintzak kaleratu eta hiriburuko herritarrei erakustea. Jaia eguerdian hasi zen eta Iñaki Aramayok zuzendu zuen agertoki nagusitik. Arratsaldean zehar, mota askotako proposamenak eskaini ziren bi agertokietan eta kalean muntatuta zeuden standetan. Eusko Jaurlaritzako eta baita hiriko agintariek ere hartu zuten parte hitzorduan. Mandatari euskaldunen kasuan, Argentina-Mercosur-erako Ordezkaritzako buru den Sara Pagola eta Etxepare Institutuko Aizpea Goenaga izan ziren. Buenos Aireseko Udalaren izenean, Claudio Avruj eta Julio Croci. 

[Irudi esanguratsuenetako bat da, Euskal Echea Institutuetako ikasleen desfilearena. Ikurrina eta Argentinako bandera eramanez agertoki nagusiraino desfilatu zuten neska-mutilek, jaiari hasiera emateko (argazkia EuskalKultura.com)]

[Behin jaia hasita, musika eta dantzekin inauguratu zen agertoki nagusiko programa. Buenos Airesko Lagun Onak abesbatzak eta Jose M. Gutierrez txistulariak lagunduta Aurresku dantzatu zuen Mauro Uranga dantzariak. Horren ostean, Lagun Onak-ek bere errepertorioko beste abesti batzuk kantatu zituen, tartean Txoriak Txori eta Kattalin (argazkia EuskalKultura.com)]

[Dudarik gabe, festaren erakarpen nagusietako bat euskal sukaldaritza da. Hori dela eta plater tipikoak eskaintzen dituzten hainbat txosna ere egon ziren ‘Buenos Aires celebra’n, molde herrikoi zein jasoagoen isla. Irudian oso ezagunak diren San Nicolaseko Euzkal Etxea-ko sukaldari eta paellak (argazkia EuskalKultura.com)]

[La Platako Lazkao Jatetxeak ere izan zuen lekua 2014ko BACen. Standeko berezitasuna txistorra izan zen. Argazkian, Jose Boccardo sukaldaria (argazkia EuskalKultura.com)]

[Laurak Bat-en stand aurrean ere ilara luzeak sortu ziren eta paella jan ahal izan zen bertan (argazkia EuskalKultura.com)]

[Lomas de Zamorako Denak Bat-en jatetxearen txosnan, berriz, txistorra, babarrunak, tortilla eta enpanadak (argazkia EuskalKultura.com)]

[Buenos Aireseko Euskaltzaleak euskaltegiko pintxoek gero eta ospe handiago dute. Jende asko hurbildu zen standera euskal mokadu hauek dastatzera (argazkia EuskalKultura.com)]

[Jakina denez, ekainaren 8an eta Gure Esku Dago dinamika herrikoiak deiturik Kate Giza bat egingo da Euskal Herrian Durangotik Iruñera. Diasporatik ekimenari babesa emateko, ‘Buenos Airesek ospagai’ ekitaldian ere kate bat egin zen, Gure Esku Dago abestiaren erritmora (argazkia EuskalKultura.com)]

[Katea agertoki nagusian hasi eta Mayo Plazara iritsi zen (argazkia EuskalKultura.com)]

[Euskal Herriko hizkuntzaren presentzia bermatzeko, euskara stand bat muntatu zen Mayo Etorbidean. Euskara Munduan programako Argentina eta Uruguaiko ikasle eta irakasle batzuk arduratu ziren standaz (argazkia EuskalKultura.com)]

[Adin guztietako publikoa hartu zen gogoan jaia antolatzeko. Txikienek ere izan zuten ondo pasatzeko lekurik (argazkia EuskalKultura.com)]

[Izen-abizenen esanahiak, arbasoak nongotarrak, herrien kokapena… Genealogia standeko neskek ez zuten atsedenaldirik izan arratsalde osoan (argazkia EuskalKultura.com)]

[Euskadi-Basque Country-ren standera izen ezaguneko bisitariak bildu ziren. Eguerdi aldera La Oreja de Van Gogh talde donostiarreko kideak bertaratu ziren iragarrita zeuden zozketak burutzeko. Sara Pagola, Aizpea Goenaga eta musikariak eurak lagun, donostiarrek Rosario, Cordoba, Mendoza, Mar del Plata eta Bahia Blancan gauzatuko dituzten kontzertuetarako sarrera bina zozketatu ziren (argazkia EuskalKultura.com)]

[Euskal kulturari buruzko hainbat hitzaldi eman ondoren, jai honetan parte hartzera eta Argentinako euskal jatorrizko jendea ezagutzera Larrabetzutik etorritako Toti Martinez de Lezea ere izan zen jaialdian protagonista. Euskadi-Basque Country-ren standean bere irakurleekin bildu, liburuak sinatu eta Euskal Herriko mitologiaz hitz egin zuen idazleak (argazkia EuskalKultura.com)]

[Ekintzak bata bestearen atzetik pasatu ziren tauletan. Euskal musika tresnen txanda Euskaltzaleak-eko Mauro Telletxea eta Iñaki Esquiroz albokariekin hasi zen. Bideoa hemen ikusgai (argazkia EuskalKultura.com)]

[Eta Laurak Bat-eko Ixilik Taldearekin jarraitu zuen. Bideoa hemen ikusgai (argazkia EuskalKultura.com)]

Bihar segituko du