euskalkultura.eus

Bilbo, Bizkaia. Idilio lírico vasco en dos actos azpititulu moduan zuela, 'Maritxu' Jesus Guridiren lehen obra nazionalista izan omen zen. Ondoren, eta bide berari eutsita, Amaya, El caserío eta Diez melodías vascas bezalako lan famatu eta behin eta berriro interpretatuak idatzi zituen musikagile gasteiztarrak.

Emilio Sagi zuzendariaren hitzetan, “pertsonaien eta eszenografiaren konposizioak euskal nortasunaren zein paisaiaren adierazgarri behar dute izan”. Hortaz, obraren bertsio eguneratu honek Ramon Lazkano musikagileak zarzuelaren inguruko materialei buruz egindako edizio kritikoa hartu du oinarritzat, Lazkanok urtetan egindako lanari bide emanez.

Zarzuelaren eraberritze prozesuari libretoa laburtzearekin ekin zitzaion, obra antzerki garaikideko moldeetara ekartzeko. Aldaketen artean, Mirentxuk bere lehengusuarekiko sentitzen duen maitasun horren itxurakeria ezabatu nahi izan du zuzendariak. Jatorrizkoan agertzen zen errota ere kendu egin du muntaia berriak, "Mirentxuren nortasunak euskal paisaiaren magia eta poesia helarazteko asmoarekin".

Zarzuela euskaraz aurkezten da eta gipuzkoar ahoskera lortzeko, Sagik Alejandro Zabalaren laguntza izan du. Zabala, izan ere, Bilboko Musika Kontserbatorioko irakasle izatearekin batera aditua da Guridiren obran.

Miriam Ocariz diseinatzailea izan da jantzien arduraduna, eta obraren moldaketa honek duen ikutu moderno eta eraberrituaren harira, diseinu berritzaileak sortu ditu. Ehun tradizionalak hartu ditu eredu, eta xehetasunei garrantzia eman beharrean, konposizio orokorrago bat bilatu nahi izan du.

Mirentxu emakume ahul eta hauskor gisa aurkezten du obrak, jantzi arrosaz jantzirik, ezpainak gorriz margotuta, “maiteminduta dagoen emakume baten indarra” islatzeko.

Eszenografiari dagokionez, Daniel Bianco izan du arduradun, eta errealismotik urrunduz, urrezko azalez jantzi ditu zuhaitzak eta paisaia. Izan ere, Sagi beraren hitzetan, “istorioan errealismoa duten gauza bakarrak, maitasuna eta pasioa dira”.

Obra, jatorriz, 1910eko maiatzaren 31ean estreinatu zen Bilboko Campos Eliseos antzokian.

-Xehetasunak Arriaga antzokiaren webgunean, hemen