euskalkultura.eus

Necochea, Argentina. Aurtengo egitarauari jarraituz, euskaldunen presentzia bermatu zuten Necocheako Euzko Etxeako lagunek bertako Gizataldeen topaketan. Hiru egunez luzatu zen ekimenean, eta beste herrialde askotako taldeekin batera, Euskal Herriko ordezkariek euren standa ezarri zuten Miguel Lillo parkean eta jendeari oso erakargarriak gertatu zitzaizkion hainbat euskal mokadu eskaini zizkieten bertaratutakoei, tartean, txistorra, pintxoak eta solomoa.

[Euskal etxeko emakume eta gizonak, neska eta mutilek lan egin dute Gizataldeen Festako eusko txokoan (argazkiak EE)]

Festaren baitan eta sukaldaritzaz aparte, Euskal Herriko kultur adierazpen gehiago erakutsi zizkieten Euzko Etxea-ko lagunek bildutako bisitari eta turistei. Erakustaldiko agertoki nagusian danborradako danborren hotsak entzun ahal izan ziren euskal etxeko jotzaileen eskutik. Horretaz gain, Gazte Alai dantza taldeak bere koreografiak ere aurkeztu zituzten bildutako jendeen aurrean.

San Sebastian Jaia

Kanpoko Kolektibitateen topaketaren data dela eta, astebete atzeratu behar izan zuten euskaldunek San Sebastian jaia baina horrek ez zuen festaren izpiritua aldatu. Urtarrilaren 27an erromeria ospatu zen euskal etxeko balio anitzeko aretoan eta biharamunean, hau da larunbatean, 28an, berrehun bat lagunentzako afaria.

[Berrehun bat lagunentzako paella prestatu zuten etxekoek. Afarian, euskal etxeko arduradunek erakundeko alkatea izendatu zuten Sara Zubillaga Esnaola. Euzko Etxea-ko lehendakaria den Felipe Muguerzak hitz batzuk zuzendu zizkion bildutako jendeari (argazkiak EE)]

[Euskal etxeko agintariei eskainitako aurreskua (argazkia EE)]

Gonbidatu guztiek, Necocheakoek eta baita ere Mar del Plata, Bahia Blanca, Laprida, Buenos Aires, Balcarce, Chascomus, La Plata, Maipu, Cañuelas, Lomas de Zamora, Rosario, Tandil, Trenque Lauquen eta Villa Mariako euskal etxeetatik agertutakoek, gozatu ahal izan zuten paellaz eta danborradaz. Necocheatik hurbil eta hain hurbil ez zeuden europar batzuek ere hartu zuten parte jaian, euskaldun talde batek eta turista italiar talde batek ere, hain zuzen.