euskalkultura.eus

Buenos Aires, Argentina. Urtero bezala, euskara klaseak hasi baino egun batzuk lehenago, joan den larunbatean, martxoaren 29, Euskaltzaleak —Buenos Airesko Euskaltegia— berriro atera zen kalera auzoari bira ematera, musika, dantza, ikurrinak, eta begietan nabari zen ilusio handia lagun. Bi trikitixa, hiru pandero, txistu pare bat eta ehun bat gazte, eta ez hain gaztetik gora ibili ziren San Telmoko kaleetan barrena kantuan eta dantzan. Ibilbidea amaituta, atzera Euskaltzaleak-en, festak berandu arte jarraitu zuen, Bernardo de Irigoyen kalean eta 9 de Julio etorbide enblematikotik metro gutxira, euskal etxearen barruan zein kanpoan.

Koadrila erraldoiak ilunabarrean hasi zuen ibilaldia. Lehen geldialdia El Refuerzo tabernan izan zen, Kataluniako Casal aurrean. Jauzi eta fandango batzuen ostean, ibilgailuen joan-etorria saihestuz, ibilbideari ekin zioten berriro. Hurrengo dantza tokia Bolívar kalean izan zen. Gaua aurrera zihoan, musika ez zen gelditzen eta dantzariek zukatzen ari ziren koreografiak, beste askok kalimotxo eta solasaldiei ekin bitartean. Euskaltzaleak-en egoitzara itzulita, pintxoak eta bokatak, Etxeko sukaldari taldeak ederki prestatuta, energia injekzio legez, lagun artean eta auzokoekin gau bikaina partekatzen jarraitzeko.

Buenos Airesko Euskaltzaleak elkarteak San Telmo auzoan antolatutako Trikipoteoa 

Aurreko edizioetan bezala, 15. Trikipoteo hau lagun zaharrak berriz elkartzeko aukera ederra izan zen, "hangoak" eta "hemengoak". “Hemengo”en artean, Buenos Airesko Laurak Bat eta Nafar Etxekoak, La Platako Euzko Etxekoak, Arrecifeseko Euskaldunak Denak Batekoak eta Necocheako Euzko Etxeko kideak. "Nire semea aurretik egona zen, nik berriz estreineko aldia izan dut, gustu hori eman ahal izan diot neure buruari eta benetan ederki pasatu genuen, gau ederra", diosku Necocheako Arantxa Zubillagak.

Maria Fernanda Astigarraga La Platako kideak, berriz, "Astigarragako Miren Irizar Belaunzaran itzultzaile eta irakaslearekin joan ginen" esan dio EuskalKultura.eus-i."Miren Diaspora ezagutzeko asmoz bolada batez ari da bizitzen gure hirian". "Berak ez zuen inoiz pentsatuko Euskal Herritik 10.000 km baino gehiagora bere lagun handi Ioritz Goizueta trikitilari astigarragatarrarekin topo egingo zuenik!". Ez ziren gutxi izan jaian euren 'enbaxadoreak' izan zituzten Euskal Herriko herri eta hiriak, tartean Zornotza, Astigarraga, Ibarra, Urretxu, Barrika, Astrabudua, Durango, Donostia, Bermeo, Laudio, Lekeitio eta, ziur aski, beste hainbat tokitako gazteak, euren partaidetzarekin giro ezin hobea sortzen lagundu zutenak.