euskalkultura.eus

Ontario, AEB. Noka talde kaliforniarra bira egiten ari da urrian AEBetako zenbait euskal etxetan, NABO (North American Basque Organizations) federazioaren Gurea kultur egitasmoaren barruan. Iragan urriaren 5ean abiatu zen bira Oregon estatuan, Ontario Basque Club elkarteak antolatu zuen ekitaldian.

Taldeak Laurent Ascarain gitarrajole baigorriarra izan zuen lagun taulagainean eta emanaldian pantaila erraldoi bat erabili zuen abestien letrak --jatorrizko euskaran zein ingelesera itzulita-- entzuleei erakusteko. Pantaila honen bidez abestiei buruzko azalpenak eta irudiak ere erakutsi zituzten, eta taldearen izenaren esanahia ere argitu zuten ('noka' hitanoaren barruan solaskideak emakumeak direnean erabiltzen den tratamentua da, esan zuten). Kontzertuaren ostean lagunarteko afarian bildu ziren elkarteko bazkideak eta Nokako musikariak.

Ontario Basque Club elkarteak kontzertuaren argazki bilduma argitaratu du Facebooken (guk horietako batzuk ekarri ditugu hona) eta emanaldiko bi bideo ere plazaratu ditu. Horietako bat da, adibidez, "Amak ezkondu ninduen" hau.

[Noka taldeko kantariak Ontario Basque Club-eko Lisa Corcosteguirekin (ezkerretik bigarrena), kontzertuaren ostean (argazkia OntarioBC)]

[Kontzertua amaitu eta gero entzuleek Ontario Basque Club-eko egoitzan ikusgai dagoen euskal kultur erakusketa bisitatu zuten (argazkia OntarioBC)]

Biharamunean taldea Idahoko Mountain Home-era mugitu zen eta kontzertua eskaini zuen NABOren Udazkeneko Bilkuran. AEBetako hainbat euskal etxetako ordezkariak bertan ziren eta euren aurrean jo zuten Nokakoek.

Taldearen birak bihar bertan izango du jarraipena, Nokak Kaliforniako Stanford Unibertsitatean egingo duen emanaldiarekin. Kontzertu hau Stanfordeko euskal ikasketa programarekin lankidetzan antolatu da. Etzi larunbata, taldeak laugarren eta azken emanaldia eskainiko du, Lincoln-en, oraingoan NABOren Kantari Egunaren barruan. Kaliforniako Rocklingo Iparreko Ibarra Euskal Etxeak antolatu du, euren urteroko piknikarekin batera. 2012ko Kantari Egunaren egitarau osoa, hemen.

-Nokari buruzko informazio gehiago, hemen