euskalkultura.eus

Cordoba, Argentina. Euskal Herriko ohiko errezetak biltzen dituen liburuak arrakasta handia izana du Argentinako euskal sukaldeetan. Izan ere, hamarretik gora euskal etxe bisitatu ditu orain artean sukaldari cordobatarrak eta bakoitzean, bertako kideek lagunduta, 'Euskal baserrietako sukaldaritza'-n agertzen diren plateretako bat edo gehiago prestatu izan ditu.

Hiriburu cordobatarrean, Gerora Elkarteak hiriko ‘Juan Griego’jatetxean antolatutako ekitaldian, ordea, nobedade bat proposatu eta gauzatu zen. “Jatetxeko nagusi eta chefa den Omar Tamargo Bazterricak prestatu zituen errezetak eta ondo baino hobeto atera zitzaizkion. Bere gourmet ukitua jarri eta paregabeko itxura onarekin aurkeztu zituen mahaietan”, adierazi dio Echavek EuskalKultura.com-i.

[Baietz taldeko mutilek  musika jarri zioten "Euskal baserrietako sukaldaritza" liburuaren aurkezpenari (argazkiEE)]

Gaua animatzeko ardura, berriz, euskal etxeko artistena izan zen. Egiari zor, jardunbide handiko Baietz-eko musikariei ez zitzaien batere zaila egin bildutako lagunen gustuko abestiak jotzea. Zuzeneko musikarekin, Txotx! taldeko dantzariak ere luzitu ziren euren koreografiekin.

[Euskal zaporeak, euskal musika eta euskal dantzak edergarri Marita Echavek Gerorako kideei egindako bisitan (argazkiEE)]