euskalkultura.eus

New York, AEB. Eusko Etxea elkartean ikusgai da iragan asteburuaz geroztik Angela Mejias argazkilariaren 'Geroa eta Itxaropena' erakusketa. Extremaduran jaio zen Mejias, baina Baionan bizi da txikitandik. Irudi hauetan Mejiasek euskal kulturari buruz duen ikuspegia islatzen du, oso gertukoa sentitzen baitu. "Horregatik jarri diot izenburua euskaraz, ze beste hizkuntzak azaldu ahal izango luke-eta hemen bizitzerakoan sentitzen dudana? Ahaztu gabe, gainera, Extremadurakoa izanagatik ez nautela sekula desberdin sentitu arazi?", azaldu dio Mejiasek EuskalKultura.com-i.

New Yorkera heldu aurretik erakusketa Montrealen izan zen, Quebec-eko Euskaldunak elkartearen 15. urteurrena kari. Argazkiak Baionatik Ameriketara ekartzeko Mejiasek Euskal Kultur Erakundearen laguntza izan zuen. "Abentura nahiko zoroa eta ausarta izan da, baina tira, EKEko zuzendari Pantxoa Etchegoinen sostenguarekin eta Montrealeko Euskal Etxeko presidente Adelaide Darasperen laguntzarekin buru-belarri sartu nintzen bidaian", azaldu du Mejiasek. 

['Geroa eta Itxaropena' erakusketako irudi bat (argazkia AMejias)]

Montrealetik New Yorkera egin du jauzi erakusketak, Sagar Handiko lagunen ahaleginari esker: Eusko Etxea-ko Ibon Santiago, Jose Antonio Alcayaga eta Itziar Albisu presidentea tartean, besteak beste. Iragan asteburuan inauguratu zen erakusketa eta hilaren 15a arte izango da ikusgai. Horren ondoren, Mejiasen ametsa erakusketa beste euskal etxeetara ere bidaiatzea da.

[Montrealeko Euskal Etxeko lagunak ere parte hartu zuten New Yorkeko inaugurazio ekitaldian]