euskalkultura.eus

Vitoria-Gasteiz. Berezia izan da 2013ko Gaztemundu, aurten Diasporako gazteei zuzenduriko trebakuntza ikastaro honek ez duelako adin mugarik izan, aurreko edizioetan ez bezala. Arrazoia zera zen: euskal musika tresnak zirela aurten gaia eta, partaideen aukeraketa egitekoan, betebehar nagusienetakoa instrumentua ondo jotzen jakitea zela. Maila oneko musikariak biltzeko, adin muga kentzea erabaki zen.

Gainera, hautaketa prozesuan nobedade bat sartu zen: hautagaiek bideo bat bidali behar izan zuten, bakoitza bere gustoko instrumentua jotzen (txirula, alboka, trikitixa, pandero...). Horri esker maila oneko taldea bildu da eta --irakasleek EuskalKultura.com agertu diotenez-- ikastaroa benetan aprobetxatu eta baliatu dute. Bi aste eman dituzte Gasteizen, Musika Etxean jo eta su ikasten, eta teknika nabari hobetu eta aurrerapauso handia egin omen dute tarte honetan.

Egunak jardueraz josita izan dituzte ikasleek: klaseak, entseguak, emanaldiak, bisitaldiak, txangoak, lagun berriak, Donostiako Estropadetako giroaz gozatzeko aukera eta baita Gasteizko dantza plazan dantzari eta musikari aritzeko aukera ere!

Jarraian, Gaztemundu 2013ko une batzuk iruditan:

[Gaztemunduko taldearen parte bat, Gasteizko Udal Folklore eskolako irakasleekin (argazkia Gaztemundu)]

[Musika ikasi zuten; baita euskal dantzak ere. Argazki honetan, luzaketak egiten euskal dantza klasea hasi aurretik (argazkia Gaztemundu)]

[Gaztemundu taldea Donostian, Kontxako estropadak ikusi ondoren (argazkia Gaztemundu)]

[Lehendakariak egin zien harreran, Garikoitz Mendizabal txistulariaren kontzertua entzuten (argazkia Gaztemundu)]

[Cordobako Gerora Euskal Etxeko Fernando Zabalza, Agustin Alonso eta Franco Seghesso Lehendakariari euskal etxeko opariak ematen. Hirurak Baietz musika taldeko kide dira (Argentinan euskara hutsez grabatu duen taldea). Oparien artean taldearen CDak ere eman zizkioten Urkulluri eta Mendizabali (argazkia Gaztemundu)]

[Oiartzungo Musika Eskolaren Txokoan (Soinuenea ere deiturikoa), Juan Mari Beltran musikariarekin (argazkia Gaztemundu)]

[Taldeko bi kide Zarauzko Euskal Jaietan dantzan (argazkia Gaztemundu)]

[Bilboko Guggenheim museoan (argazkia Gaztemundu)]

[Eltziegoko Marque de Riscal upategian (argazkia Gaztemundu)]

[Franco Seghesso, Martina Saa, Fernando Zabalza eta Jose Gutierrez Gasteizko dantza-plazan jotzeko entsaiatzen (argazkia Gaztemundu)]