euskalkultura.eus

Donostia-San Sebastian. Munduko hainbat euskal etxeetatik Olentzeroren bisitaren berri ari gara jasotzen Gabon Gaua heldu aurretik ere pertsonaia mitologikoak sobera lan egin duenaren seinale. Argentinatik, Mar del Platako Denak Bat Euskal Etxetik, adibidez, abenduaren 4ean egin zuten jaieko argazkia bidali digute: Olentzero opariak banatzen elkarteko umeen artean. Euskal Etxeak Euskararen Astearen barruan ospatu zituen Olentzeroren festa eta urte bukaerako jaia. Horren ostean, hego hemisferioko euskal elkarte asko bezala, udako oporretaz gozatzen ari dira Mar del Platako euskaldunak. 

[Artaburu Euskaltzale Elkarteak antolatu zuen Euskararen Astean egin zen Olentzeroren jaia Mar del Platan (argazkia MardelPlataEE)]

Argentinako uda utzi eta Londreseko negu gorrian ere ibili da Olentzero. London Basque Society elkarteak abenduaren 11an egin zuen Gabonetako jaia eta lagun koadrila polita bildu zen Oxford House egoitzako aretoa nagusira. Bertan bazkari goxoa egin ostean Olentzerok opariak banatu zituen elkarteko txikien artean eta ondoren musika eta kantuan aritu ziren Londreseko euskaldunak. Bazkariarekin batera 'XXI. mendeko euskaldunak' izeneko erakusketa inauguratu zuten elkarteko Oxford Gallery aretoan. Eta badakigu Londreseko euskaldunak erakusketaren bigarren zatiko izarrak izango direla (datozen egunetan emango dugu honen berri).

[Londresen, Oxford Houseko areto nagusian bazkaltzen Olentzeroren bisitaren zain (argazkia LondresEE)]

Egun berean Washingtonen ere ospatu zen Olentzero jaia, eta AEBetako hiriburuko euskaldunek urtero bezala bazkaria egin zuten eta seme-alabek ikazkinaren bisita jaso zuten. Elkarteko Jurdana Izagirrek azaldu digunez, umeek Olentzerori abestu zioten lehenik eta gero, nerbio eta algara artean agertu zenean, opariak jaso eta berarekin hitz egiteko aukera izan zuten. 

[Olentzero opariak banatzen Washingtoneko Euskal Etxeko umeen artean (argazkia WashingtonEE)]

Sydneyn, Australian, ere ibili zen Olentzero. Abenduaren 12an Sydneyko euskaldunek urtero legez Gabonetako piknika egin zuten Centennial Park-en, Australiako uda giroaz gozatzeko, eta bertan agertu zen Olentzero. Umeen artean opariak banatu ostean trikitixaren musikarekin dantzan eta kantuan aritu ziren elkarteko haur eta kideak.

[Sydneyko Centennial Park-en trikitixa eta guzti egin zioten ongi etorria Olentzerori (argazkia SydneyEE)]

Azkenik, Murtziako Euskal Etxetik ere, Espainiatik, heldu zaigu Olentzeroren bisitaren berri. Euskal elkarteak abenduaren 19an egin zuen bere Gabonetako afaria, babarrun jana, eta bertan agertu zen Olentzero, txikien artean opariak banatzeko.

[Umeek adina gozatu zuen Murtziako Olentzerok opariak banatzen (argazkia MurtziaEE)]