Biarritz, Lapurdi. Biarritzeko Gailurrean parte hartzen ari diren herrialdeetako buruzagiek aukera izango dute egunotan euskal gastronomia dastatzeko. Ez dakigu Trump-ek eutsi ahal izango dion gertuen dagoen McDonaldsera hanburgesa eta patatak ketchup zurrustada batez irenstera joateko tentazioari, baina egia da Gailurreko inaugurazio afariak euskal menua zeukala atzo: piperrada, marmitakoa, "La Pèche de Monein au Joko, saveur de gâteau basque" eta bertako gaztak, hori guztia besteak beste Irulegiko ardo nafarrez bustia (Domaine Brana 2018).
Honela du argitara emana RTKko kazetari William Galibert-ek, itsatsiz gainera ohar honekin batera doan menua. Afaria Senpereko (Lapurdi) l'Auberge Basque jatetxeko Cédric Béchade sukaldariak sinatzen du, Eliseoko sukaldaritza buru Guillaume Gomez-ekin batera.
On egin!
(horrez gain, buruzagien ezkontideen --gainerakoen emakumeak eta Merleken senarra-- programak Lapurdi barnealdera eramango ditu beste gonbidatu hauek, besteak beste Kanboko Arnagara eta Ezpeletara, Ezpeletako Biperra zein Baionako txokolate famatua dastatzera esaterako, eta euskal pilota ezagutzera)
Lagun bati bidali
Komentarioa gehitu
