euskalkultura.eus

Buenos Aires, Argentina. Mota askotako ekintzak egin dira Argentinako euskal eta nafar etxeetan 2014ko Sanferminak ospatze aldera. Eta Iruñean festa pil pilean dagoen bitartean, Argentinako sanferminzaleek ez dute ia ezer faltan botatzen euren inguruetan antolatutako jaiei esker. Iruñeko irudiak bezala, Argentinako sanferminetakoak ere ari dira sare sozialetan zabaltzen. Hona hemen fenomenoaren isla:

[Buenos Airesko Nafar Etxeak elizkizunak antolatu zituen uztailaren 7an. Mezaren ostean, euren egoitzan bildu ziren lagunak pintxoak dastatu eta dantza egitera. Ohiko bazkaria, berriz, uztailaren 9an izan zen. Txupinazoak eman zien hasiera festari eta dantzaldiari. Kalean dantzariek ez ezik, kiliki eta buruhandiek ere dantzatu zuten. Bazkaldu eta gero, ikuskizunak egoitzako areto nagusian jarraitu zuen paella eder bat eta musika ikuskizun batekin (argazkiaNE)]

[Chascomus hirian Zingirako Euskaldunak euskal etxeak izan zuen San Fermin bazkaria antolatzeko ardura. Festa uztailaren 6an izan zen Marcha delako erakundearen instalazioetan eta ehundik gora lagun biltzeaz gain, txupinazoarekin, zuzeneko musikarekin eta euskal dantzekin omendu zuten chascomustarrek Nafarroako Santua (argazkiaEE)]

[Coronel Pringlesko Eusko Biltzar Euskal Etxeak San Fermin eta Argentinako Independentziaren Eguna ospatu zituen programa oparo batekin. Uztailaren 7an, ‘Hay vuelta de hoja’ liburu erakusketaren inaugurazioa egin zuen, hiriko alkate Carlos Oreste lagun. Zeremonian euskal dantzak dantzatu zituzten etxeko gazteek. Jose Olasagastia Eusko Biltzar-eko lehendakariak hitz batzuk zuzendu zizkion publikoari: “Gaur Sanferminak eta uztailaren 9a, Argentinako Independentziaren eguna, ospatzen ari gara, etorkizun hurbilean Euskal Herriak bere Independentziaren Eguna ere izango duelakoan”, esan zuen (argazkiaEE)]

[Rio Negroko probintzian, General Rocako euskal gizataldea ere bildu zen San Fermin eta uztailaren 9a ospatzeko. Bazkaria Gure Etxea Euskal Etxean izan zen eta menua, etxekoek prestatutako paella (argazkiaEE)]

[Eta tandildarrek ere izan zituzten euren sanferminak: meza, lore sorta Gernikako Arbolaren kimuaren oinarrian eta txupinazoa etxeko balkoitik. Eta hori hasiera baino ez zen izan. Bazkalostean dantzaldi ederra oparitu zizkieten Gure Etxeako dantzariek bildutakoei (argazkiaEE)]