euskalkultura.eus

La Plata, Argentina. Juana Josefa Cipitria y Barriola zen bere izen zibila edo Candida Maria de Jesus izen erlijiosoa, nahiz eta bere inguruan Ama Kandida bezala zen ezagunagoa. Andoain-en, Gipuzkoan, jaio zen 1845 urtean. Bere bizitzako obra eta emaitza bezala Jesusen Alabak kongregazioa sortu zuen, heziketa katolikoa bultzatzeko asmoz, gauregun hamazazpi lurraldetan dagoen ordena.

Joan den urriaren 17an, Benedikto XVI. Aita Santuak santu egin zuen Ama Kandida eta kari horretara La Platan, Corazon Eucaristico de Jesus Eskolako agintariek bertako Euzko Etxea euskal etxeko kideak La Plata hirian egin ziren ospakizunetan parte hartzera gonbidatu zituzten.

[Urriaren 10ean elizkizunak ospatu ziren La Platako Katedralean]

Hasteko, Eucaminata izeneko ibilaldia burutu zen hiriko kaleetan. Urriaren 10ean, berriz, meza egin zen Katedralean. Elizkizunetan, Argentinako bandera eta ikurriña elkarren ondoan egon ziren.

Azaroaren 12 eta 13an, aipatu eskolako ikasle ohien batzordeak antolatutako erakusketa ikusgai ipini zen eskolako egoitzan. “Argazkiak, jantziak, eskolako tresnak… Ama Kandidaren idealak islatzen zituzten beste garai bateko gauzak” bilduz, azaldu dute ekimeneko arduradunek. 13an, Euzko Etxeko abesbatzak eta dantzari helduek abesti eta dantza emanaldiak egin zituzten Ama Kandidaren eta urteotan Euskal Herritik La Platara heldu diren hamaika erlijiosoen omenez.

[La Platako Euzko Etxeko abesbatzak bere euskarazko errepertorioa eskaini zuen ekitaldian]

[“Teatro Argentino”ko Kamerata Akademikoa]

Azkenik, eta ekitaldi programa bukatzeko, azaroaren 25ean, La Platako Teatro Argentino-ko Ginastera Aretoan bertako Kamerata Akademikoak Mozart, Vivaldi eta Elgar-en piezak interpretatu zituen. Dantzak ere ikusi ahal izan ziren omenaldiaren amaierako zeremonian. Euzko Etxeko dantzariek Aurresku, San Migel, Ezpata dantza, Plazara, Fandango eta Arin Arin eta Arku dantza dantzatu zituzten.

[Euzko Etxea Euskal Etxeko dantzari ertainek Arku dantza egin zuten]

Ospakizuna, Eskolako abesbatzaren aurkezpenarekin bukatu zen. Probintziako nagusi Ama Gracielaren hitzen ondoren, koruak Ave María, Pie Jesu eta Ama Kandidaren omenezko ereserkia abestu zituen.