euskalkultura.eus

Bilbo, Bizkaia. Bingen Zupiria Eusko Jaurlaritzako Kultura sailburuak eta Marian Elorza Kanpo Harremanetarako idazkari nagusiak bisita egin dute gaur goizean Bilbon Euskadiko Artxibo Historikora, hain zuzen ere duela bi urtedanik honen barruan garatzen ari den Euskal Diasporaren Artxibora. Bisitako parte izan da baita ere Gorka Alvarez Aranburu Kanpoan den Euskal Komunitatearentzako zuzendaria, eta Ondare arloko eta Artxiboko arduradunak, baita, xehetasun emaile, zuzenean diasporako materiala katalogatzeaz arduratzen ari den Mikel Gomez teknikaria ere.

Zupiria sailburuak eta Kanpo Harremanetarako idazkari nagusiak biziki eskertu dute Artxiboa osatzen joateko orain arte jasotako lankidetza ugaria, eta iristen segitzen duten dokumentu, objektu eta informazio dohaintzak. Artxiboko arduradunek jakinarazi dutenez, gaur egun 7.000 dokumentu-sarrera, 955 ale bibliografiko eta 230 objektu daude katalogatuta, kronologia eta jatorri askotakoak; eta funts horiek handitzen jarraitzen dute, mundu osoko leku eta garai desberdinetako dohaintza eta material berriekin.

Kultura sailburuak bisita baliatu du Euskal Herrian bertan zein diasporan bizi diren euskal herritarrei proiektuan laguntzeko deia berresteko. Izan ere, Euskal Diasporaren Artxiboa, Euskal Herriaren historia orokorraren kapitulu garrantzitsua diren munduko euskaldunei buruzko historia jaso, gorde, ikertu eta zabaltzeko langintzan erreferentziazko baliabidea izateko bidean da, mundu osoko euskaldunak eta euren dohaintza eta lankidetzak partaide.