Vitoria-Gasteiz. Eusko Jaurlaritzak bi euskal etxe berri onartu ditu gaur eguerdian egin duen Gobernu Kontseiluan: Argentinan, General Belgranoko “Asociación Civil Centro Vasco de General Belgrano”; eta Perun, “Centro Cultural Vasco Peruano de Trujillo”. Hauekin, guztira, 193 euskal etxe daude Eusko Jaurlaritzak mundu osoan ofizialki onartuta eta eskubidez, esaterako, lau urtean behin --hurrengoa 2019an-- egiten den Euskal Gizataldeen Mundu-Batzarrean zuzenean edo ordezkari bidez parte hartzeko gaituta.
Gaur egun, 25 herrialdek daukate bere baitan euskal etxerik. Argentinaren kasuan, 85 dira dagoeneko bertan Jaurlaritzaren aurrean ofizialduta daudenak; Peruen kasuan, berriz, hirugarrena da Tujillokoa, Limakoaren eta Cuscokoaren ondotik.
EuskalKultura.com-ek emana zuen iaz General Belgranoko euskal etxearen proiektu eta urrats berrien berri, eta elkartearen jardueren aipu ematen segitu du geroztik; baita Trujilloko euskal etxe berriaren kasuan ere, elkarteak 2017ko azaroko abiatze-bilera egin ondoren.
Ongi etorri eta zorionak bioi!
Lagun bati bidali
Komentarioa gehitu
