euskalkultura.eus

Gral. Rodriguez, Argentina. Argentinako probintziak eta baita munduko herri askotako standak ere ikusi ahal izan ziren Gral. Rodriguezeko Gizataldeen Erakustaldian. Haiti, Kuba, Peru, Brasil, Uruguai, Mexiko, Libano, Espainia, Italia, Eskozia, Irlanda eta Euskal Herriko kulturetan ibilbidea egiteko aukera publiko orokorrari egon da irekia joan den maiatzaren 26tik 29ra. Egun hauetan, eta antolatzaileek jakinarazi dutenen arabera, hamabost mila inguru bisitari hurbildu ziren Tren Geltokiaren ondoko lur-esparrura.

Euskaldunen kasuan, Eusko Aterpea-ko kideena izan zen Euskal Herria ordezkatzeko ardura. Eta ondo asko bete zuten helburu hori, euskal etxeko lagunek muntatutako standari esker. Hainbat proposamen luzatu zizkieten rodrigueztarrek eurengana hurbildu ziren bisitariei. Batetik, eta sukaldaritzaren arloan, pintxo, odolki eta sagar tarta saldu zen; beste alde batetik, Euskal Herriko irudiak proiektatu ziren telebista batean, eta abizenei buruzko informazioa emateaz gain, mota askotako oroigarri jarri ziren salgai.

[Gral. Rodriguezko Gizataldeen Erakusketako Euskal Stand eta euskal etxekoek prestatutako pintxoak (argazkia EE)]

Jaiko kabalkadan parte hartzeko momentuan, euskal etxeko bi gaztek -- Agustina Olaizola eta Hernan Renteria, euren izenak -- eraman zituzten Argentinako bandera eta ikurrina. Standean, etxeko lagun guztiek lan egin zuten, tartean, Martin Duhau, Andres Itcea eta Juan Ignacio Itcea. “Gure euskal etxea gonbidapen ofiziala jaso zuen tokiko erakunde bakarra da”, azaldu diote Eusko Aterpeako arduradunek EuskalKultura.com-i. “Hori dela eta Juan Pablo Anghileri alkatearen zorion agurra jaso dugu herriko bertako hedabideetan oihartzun handia izan zuen ekitaldi honetan”, kontatu digute rodrigueztarrek.