euskalkultura.eus

Donostia-San Sebastian. Euskarazko Produktuen Katalogoa bere 12. ediziora heldu da, dagoeneko kalean baitira 2009/2010ko eskaintza biltzen duten webgunea zein paperezko bertsio berria. Batez ere haur eta gaztetxoentzako opari proposamenak eskaintzen ditu, produktu bakoitzaz honako datuak emanez: izena, egilea, ekoizlea, prezioa, adina, urtea eta (informazio hau dagoenean) non erosi internetez.

Paperezko edizioak guztira 240.000 ale banatuko ditu Euskal Herri osoan zehar eta eskuragarri egongo da hainbat saltoki eta erakundetan. Internetez, Katalogoa.org bilatzaile bat medio kontsulta daiteke datu-basea, baita jaitsi ere PDF dokumentu gisa. Katalogoko produktuak zortzi ataletan daude sailkatuak: musika, filmak, liburuak, aldizkariak, komikiak, jostailu eta jokoak, informatika produktuak eta gurasoentzako materiala.

Nafarroatik abiatutako ekimena

Web orriak iruzkinak edo hausnarketak uzteko aukera ere ematen du. Bestalde, buletin elektronikoan e-maila emanez gero, katalogoko azken berriak posta elektronikoz jaso daitezke.

Euskarazko Produktuen Katalogoa Nafarroako herri gutxi batzuetako udalen babespean abiatu zen ekimena da eta gaur egun 200 udaletxe baino gehiagok parte hartzen dute bertan. Eusko Jaurlaritzaren, Nafarroako Gobernuaren, hiru foru aldundien eta UEMAren (Udalerri Euskaldunen Mankomunitatea) laguntza ere badu.