euskalkultura.eus

Buenos Aires, Argentina. San Martin Plazan, Argentinako hiriburuko erdigunean ikus daiteke egun hauetan Marta Minujin-ek sortutako 'Buenos Aireseko liburu Babel Dorrea'. Munduko hainbat hizkuntzatan idatzitako liburuak batzen dituen lan bide-urratzaile honek euskarazko testuak ere biltzen ditu. Izan ere, euskaraz dauden 1041 alez baliatu da artista plastikoa bere Dorrea altxatzeko. Euskadiko Ordezkaritzaren bitartez, Etxepare Institutuak, Ekin argitaletxe argentinarrak eta beste euskal erakunde batzuek – Jose C. Paz-eko Toki Eder, San Juango Eusko Etxea, La Platako Euzko Etxea, Buenos Aireseko Euskaltzaleak, Lapridako Lagunen Artean, Mar del Platako Denak Bat eta Cordobako Gure Txokoa euskal etxeek – helarazi zituzten euren ekarpenak proiektu honetan Euskal Herriko hizkuntzaren presentzia segurtatzeko.

Erakusketaren testu-inguruan, joan den maiatzaren 18an Euskadiko Ordezkaritzak “Euskadiri begira lehio txiki bat” ireki zuen San Martin Plazan, Buenos Aires hiriburuko bihotzean. “Leiho” honetatik, Euskadiko irudiak ikusi ahal izan zituzten standera hurbildu ziren bisitariek 'TV Euskadi, goza ezazu'-ren bidez.

[Enrique Aramburuk eta Jorge Beramendik Juan de Garay Fundazioaren liburuak aurkeztu dituzte (argazkia Irekia)]

Standean bertan eta egun berean Juan de Garay Fundazioak aurten argitaratu dituen lau liburuak -- “Universidad de Verano 2011 (Udako Euskal Unibertsitateko 2011ko azken lanak), Los Cuentos de Teresita (Teresitaren ipuinak); Cursillo de Lengua Vasca (Euskara ikastaro laburra) eta Aquellos Euskos, estos Vascos (Eusko horiek, euskaldun hauek) -- aurkeztu zituzten Fundazioaren ordezkari diren Enrique Aramburu eta Jorge Beramendik.

['Buenos Aireseko liburu Babel Dorrea' (argazkia Irekia)]

Gogora dezagun, 'Buenos Airesko liburu Babel Dorrea'k 24 metroko luzera duela eta 50 herrialdetako 20 mila libururekin eraiki dela. Hizkuntza eta genero askotako liburuak bihurtu dira eskulturaren oinarri, tartean nobelak, ipuinak, olerkia eta hiztegiak, besteak beste. Liburuak herritarrek eta herrialde eta kultura eta hizkuntza horietako ordezkariek eman dituzte dohaintzan. Eskulturaren erakustaldiak hiru aste iraungo ditu eta antolatzaileen arabera, 50 mila lagunek bisitatuko dute.