euskalkultura.eus

Jolasak.eu webguneak doako euskarazko jolas sorta polita eskaintzen du, interneten euskaraz denbora pasatzeko baliabideen bila dabiltzanentzat. Jolasak denetarikoak dira: bertsolaritza, estropadak, mastertxef izeneko sukaldaritza jokoa... Horrez gain, webguneak euskarazko bideo labur batzuk ere biltzen ditu.

Donostia-San Sebastián. Internet munduan gero eta euskarazko eduki gehiago eskaintzen dira, eta Iparra.eus webguneak horiek biltzen lan aparta egiten du. Bertan aurkitu dugu Jolasak.eu webgunearen berri.

Webgune honek euskarazko jolasak eskaintzen ditu, erabat doan. Jolasak gai askori buruzkoak dira, baina beti ere euskal kulturarekin harremana dute: bertsolaris, euskal gastronomia, harrijasotzaileak, estropadak, sokatira, Euskal Herriko geografia eta baita logika jokoak ere, Portugaleteko Zubi Esekia aitzaki hartuta. Jolasteko, nahikoa da gustuko jokoa aukeratzea hemen.

Horrez gain, webguneak euskarazko laburmetraia sorta bat ere eskaintzen du, euskararen erabilera sustatzeko helburuarekin. Bideo horiek ikusteko, jo hona.