euskalkultura.eus

"Arbaso euskaldunak dauzkagulako eta katea segitzeko", "euskara hizkuntza gisa interesgarria delako", "euskal musika gustukoa dugulako eta dioena ulertzeko" edo, besterik gabe, "euskal etxean eroso sentitzen garelako eta gogoa ematen digulako"… euskara ikasteko arrazoi ugari egon daitezke eta ugari izan dira baita ere Euskararen Nazioarteko Eguna ospatzeko moduak. Gaur, EuskalKultura.com-en 2016ko Argentinako Euskararen Eguneko azken ekitaldi sortaren kronika.

Buenos Aires, Argentina. Abenduaren 3an ospatu zen mundu osoan Euskararen Nazioarteko Eguna, baina leku bakoitzean ahal den momentuan ospatzen da eta aste pare bat pasatu arren oraindik iristen ari zaizkigu erredakziora euskal etxe eta leku bateko eta besteko ospakizunen berriak. Jaiak, topaketak eta ekintza kulturalak dira euskararen inguruan burutu ziren aktibitate gehienak; baina nobedaderen bat ere egon da, hala nola, Tandilen puxikak askatzea eta Viedma-Patagoneseko antzezlan bat taularatzea. Hauxe 2016ko ENEren azken kronika argentinarra: