euskalkultura.eus

Donostia-San Sebastián. Necocheako ikastola 2009ean jaio zen --ikus hemen orduan argitaratu genuen artikulua-- Argentinan, Buenos Aires probintzia hegoaldeko kostaldeko hiri honetan. 32 ikaslerekin hasi zen, lehenengo eta bigarren mailako haurrak (6 eta 7 urte) eta 2010ean 86 ikasle izatera pasatu da, lehenengo, bigarrengo eta hirugarrengo mailak goizean, eta laugarrango maila arratsaldez.

Komunitateari zabalik sortutako eskola da, ikasgaiak Argentinako Hezkuntza Ministerioaren programen arabera ematen dituena, baina aldi berean, eta eskolak berak bere buruari ezarritako helburuekin bat, 'euskal kultura' ere eskaintzen duena, beti ere euskara eta euskal kultura sustatu eta zabaldu nahiean, non eta euskal jatorriko presentzia nabarmena duen Necochea bezalako hiri eta eskualde batean.

Euskara, musika, dantza, euskal kulturaz dakien norbait

2011 ikasturterako --Argentinan ikasturtea martxoan hasten da urtero, abenduan amaitzeko-- eskola pertsona bat hartzekotan da oro har Euskal Kultura irakatsi ahal izateko. Horretarako, euskara, euskal musika, dantzak, historia eta euskal kultura alorreko ezagupen orokorra izan dezakeen pertsona bat beharko lukeelarik.

Ikastolako arduradun bat Donostian da aste honetan, ostiralera arte (urriak 15). Interesatuek bere e-mailera idatz dezakete, mailto:xzzie@yahoo.com.ar, ibilbidea, ezaugarriak, argazkia eta baliagarriak izan daitezkeen gainerako jakingarriak bidaliz.

Aste honetan Donostian elkarrizketatu

Aukera ona izan daiteke karrera bukatu berria duten gazte euskaldunentzat, ikasturte bat Argentinan eman eta bertako gizartea, eskola, moldeak eta oro har kultura bera ezagutzeko; eta baita ere euskal diaspora ere barnetik ezagutzeko, euskal gaietan hiri aktiboa baita izena ere euskal jatorrikoa duen Necochea.

Denbora geratzen da oraindik 2011 ikasturterako, baina Ikastolako arduradun hau Donostian dela baliatuz berarekin aurrez-aurre mintzatzea interesgarria izan daiteke, orain ez kontaktatzekotan, hemendik aurrerako harreman guztiak e-mail bidez edo internetez izango baitira.