Euskara zinean, musika, abesti eta liburuetan, argentinar Cordobako Gerora elkartearen eskutik

Hirugarren urtez jarraian, Cordoba hiriburuko Gerora elkarteak astebeteko ospakizunen programa batekin ospatu zuen Euskararen Nazioarteko Eguna. Egitarauaren baitan eta ekintza askoren bidez, Euskal Herriko hizkuntza nola gara daitekeen hainbat arlotan erakutsi zuten elkarteko ikasle eta irakasleek. Zinean, literaturan eta baita festetan ere euskara bera izan zen sei egunetan zehar cordobatar askoren bilgunea. Baietz Musika Taldea eta Txotx! Dantzarien Taldea ere izan ziren Euskararen Asteko protagonistak.

Cordoba, Argentina. Apustu handia egin zuten aurten ere Gerora elkarteko kideek Euskararen Eguna ospatze aldera. Proposamenak erantzun bikaina izan zuen komunitatearen aldetik eta aurreko bi edizioak bezala, 2012koa ere izan zen arrakastatsua. Ekintzak azaroaren 28an hasi ziren ‘Gazta Zati Bat’ dokumentalaren proiekzioarekin. Idiazabalgo Nazioen Mundua herri ekimenak egindako filma ‘Casa de Pepino’ izeneko kultur gunean eman zen eta oso harrera ona izan zuen publikoaren artean.

[Oso gustura ikusi zuten Gerora elkarteko lagunek ‘Gazta Zati Bat’ dokumentala (argazkiaEE)]

Hurrengo egunean, Hizkuntz Gutxituengotu eta Gutxiarazitakoen topaketa burutu zen Cordobako Liburutegian. Hirugarren elkarretaratze honetan, piemontear, ladino, yiddish eta euskara hizkuntzak izan ziren aztergai. Mintzalariei dagokienez, Vicenta Carena irakasleak Piemonteko olerki bat irakurri zuen bertsio elebidunean. Sherman adituak, ordea, abesti batzuk egin zituen yiddish-ez eta ladinoz; ondoren, Noe Fernandezek ‘Euskararen presentzia Argentinan’ delako aurkezpena egin zuen. Topaketari amaiera emateko, Gaspar Jaurenak Euskal Herriko bi kantu herrikoi egin zituen, arrabitaz lagunduta.

[Gerora-ko ikasleek eta Baietz taldeko musikariek Cordobako kaleak hartu zituzten euren hitz eta soinuekin (argazkiaEE)]

Programarekin jarraituz, azaroaren 30ean, iluntze aldera, Zirt-Zart burutu zen. Ikasle eta irakasleak, musikari eta dantzariak hiriko kaleetan ibili ziren. Ekintzak jakin-min handia piztu zion jendeari eta bat baino gehiago gelditu zen ikusi, entzun eta galdetzeko. Egun berean, afari batean bildu ziren Gerora-ko kideak, Baietz eta Txotx taldeen lagunekin.

[‘Euskara jalgi hadi plazara’ izan zen hiriko enparantzetan egin zen Liburu Askatzearen leloa (argazkiaEE)]

Abenduaren 1ean, euskara eta dantza klase ireki bat egin zen eta ondoren erromeria Proyecto Rasante izeneko gunean. Eta 2012ko Euskararen Asteari amaiera emateko, eta Euskararen Nazioarteko Egun berean, Liburu Askatze bat antolatu zen Cordoba hiriko 24 plaza ezberdinetan. XVI-XXI. mendeen bitarteko izen handiko idazleen testuen bilduma euskara ikasleek prestatu zuten propio ekintza hau egiteko.

euskalkultura.eus

Albisteak

Euskara zinean, musika, abesti eta liburuetan, argentinar Cordobako Gerora elkartearen eskutik

Erlazionatutakoak

Irakurrienak

Azken komentarioak