euskalkultura.eus

Villa Maria, Argentina. Euskal Herriaren kultura mantentzeko era ugari dago. Baina dudarik gabe, Diasporako lagunek bizkor eusten diete hizkuntzari eta dantzei. Izan ere, Argentinako euskal etxe gehienetan horiek dira ekintza nagusiak. Baina ez bakarrak. Besteak beste liburutegien lana ere oso garrantzitsua da euskal kultura zabaltzeko. Euskara, dantzak, liburuzainen bilera, danborrada… horra larunbateko egitaraua.

[Kanpoan euri zaparrada eta barruan… sokatira! Neska-mutilek bat egin zuten Bomarraca Aretoan euren indarra neurtzeko (argazkia EuskalKultura.com)]

[Joko eta jolasak bukatu ondoren, euskararen ekintzek hartu zuten txanda aretoan bertan. Hasteko, Cordobako Baietz taldeak euskarazko kantu batzuk abestu eta abestarazi zizkion publikoari (argazkia EuskalKultura.com)]

[Ondoren, Euskara Munduan programako ikasle den Gabriela Aguirrek ‘stand up’ saio bat eskaini zuen, monologo bat. Tonu umoretsuan, 'euskal diasporatarra' zer den azaldu zuen Gerora elkarteko kideak (argazkia EuskalKultura.com)]

[Euskal etxeetako liburutegien arduradunak ere bildu ziren  Euskal Aste Nazionalean. Bilkura baliagarria izan zen burututako ekintzez eta etorkizunari begirako proiektuez mintzatzeko. Irudian, liburutegietako arduradunak FEVAko idazkari Marta Abarrategui eta lehendakari Ricardo Basterrarekin (argazkia EuskalKultura.com)]

[Aldi berean euskal etxeko egoitzako beste muturrean, hitzaldi-eztabaida burutu zen Andoni Ortuzar EBBko lehendakaria eta Iker Urbina Amaiurko Madrilgo diputatua partaide (argazkia EuskalKultura.com)]

[Arratsaldeko partean, dantzekin hasi baino lehen, Donostiako Danborrada entzun zen Villa Mariako Anfiteatroan. Jose Maria Gutierrez eta Rosana Entizne zuzendari, Buenos Aireseko Laurak Bat, Bahia Blancako Union Vasca, Rosarioko Zazpirak Bat eta San Nicolaseko Euzkal Etxea erakundeetako kideek Sarriegiren aire ezagunenak ekarri zituzten Cordoba probintziara (argazkia EuskalKultura.com)]

[Emanaldiarekin hasteko patinatzaile talde batek Argentinako bandera eta ikurrina eraman zituen tauletara. Ondoren, Villa Mariako Euzko Etxea-ko dantzariek Agurra dantzatu zuten (argazkia EuskalKultura.com)]

[Jarraian, Villa Mariako bigarren talde baten txanda izan zen. Etxeko txikiek Kuadrille eskaini zuten (argazkia EuskalKultura.com)]

[Villa Mariako ertainak ere euren ekarpena egin zuten, Makil Dantza aurkeztuz (argazkia EuskalKultura.com)]

[Buenos Aires hiriko Ekin Dantzari Taldeak Arratiako Jota dantzatu zuen (argazkia EuskalKultura.com)]

[Cordobako Txotx! taldeak Baietz-eko musikarien zuzeneko doinuekin aurkeztu zuen Hemengo Jauzi (argazkia EuskalKultura.com)]

[Tres Arroyoseko taldearen eskutik, Uztai Handiak(argazkia EuskalKultura.com)]

[Lomas de Zamorako dantzariek Gipuzkoako Ezpatadantza prestatu zuten 2013ko Euskal Asterako (argazkia EuskalKultura.com)]

[Tandilgoek, berriz, Zuberoako Makil Dantza (argazkia EuskalKultura.com)]

[Jose C. Pazeko Toki Eder euskal etxeko lagunek ere eurena taularatu zuten: Eltziegoko Dantza eskaini zioten publikoari (argazkia EuskalKultura.com)]

[Dantza koloretsuena Concordiako Lantzeko Inauteriak izan zen dudarik gabe. (argazkia EuskalKultura.com)]

[Chivilcoyko Beti Aurrera-ko dantzariek Urarte aurkeztu zuten (argazkia EuskalKultura.com)]

[Eta Chacabucokoek Neskatxena dantzaren bertsio bat oparitu zieten bildutako lagunei (argazkia EuskalKultura.com)]

[Euren txanda iritsita, Azken Dantza dantzatu zuten Cordobako Gure Txokoa-ko dantzariek (argazkia EuskalKultura.com)]

[Bahia Blancatarrak bi aldiz igo ziren oholetara Hator Hator eta Zuberoako Maskarada dantzatzera (argazkia EuskalKultura.com)]

[Dantza emanaldiaren lehenengo zatiaren bukaeran, Villa Maria etxe anfitrioiko dantzari helduek --Zuzendaritza Batzordekoak ere tartean, Ismael Martinez de Alegria lehendakaria buru-- Arku Dantza taularatu zuten (argazkia EuskalKultura.com)]

[Programak iragarri bezala, HABEren euskara-agiriak banatu ziren dantzaldiaren bi zatien arteko tartean. Gogora dezagun iazko urriaren eta ezohiko deialdi batean HABEren azterketak egin zirela Buenos Airesen. Marian Elorzak, Ricardo Basterrak eta Ismael Martinez de Alegriak eskuratu zizkieten diplomak Villa Mariara bertaratu ziren euskara irakasle eta ikasleei (argazkia EuskalKultura.com)]